लण्डन । बेलायतमा फेब्रुअरी महिनामा मुद्रास्फिति अपेक्षा गरिएभन्दा धेरै खुम्चिएको छ ।
अफिस फर न्याशनल स्ट्याटिटिक्स (ओएनएस) ले बुधबार सार्वजनिक गरेको आँकडाअनुसार फेब्रुअरी महिनामा बेलायतको मुद्रास्फिति ३.४ प्रतिशत रहेको छ । यसअघि जनवरी महिनामा सो दर ४ प्रतिशत रहेको थियो ।
यो विगत दुई वर्ष यताकै सबैभन्दा कम हो ।
बैँक अफ इंग्ल्याण्ड लगायत विश्लेषकहरुले फेब्रुअरीमा मुद्रास्फिति ३.५ प्रतिशत रहने पूर्वानुमान गरेपनि मुद्रास्फिति त्यो भन्दा तल झरेको हो ।
आगामी महिनाहरुमा मुद्रास्फिति अझै घट्ने विश्लेषण गरिएको छ । अप्रिल महिनामा उर्जाको मूल्य घट्ने भएकाले यो दर अझै बढ्ने बताइएको छ ।
बेलायतका अर्थ मन्त्री जेरेमी हन्टले केही महिनाभित्रै सरकारले तय गरेको मुद्रास्फिति २ प्रतिशतमा झार्ने लक्ष्य पूरा हुने आशा व्यक्त गरेका छन् । उता अर्थशास्त्रीहरु भने बुधबारको आँकडाबाट हौसिएका छन् र केहीले यो वर्ष अन्त्यसम्ममा बेलायतको मुद्रास्फिति सरकारले अपेक्षा गरेको २ प्रतिशतभन्दा तल झर्ने बताउन थालेका छन् । कतिपयले भने अप्रिलदेखि कामदार तलव बढ्ने र रेडसीमा अझै तनाव कायम रहेकाले मुद्रास्फितिमा संकुचन केही समयका लागि मात्र हुन सक्ने तर्फ सचेत गराएका छन् ।
फेब्रुअरीमा मुद्रास्फिति घट्नुमा खाद्यान्नको मूल्यमा गिरावटले प्रमुख भूमिका खेलेको बताइएको छ ।
यस संकुचनको वावजूद पनि बेलायतमा मुद्रास्फिति अन्य मुलुकको तुलनामा अझै उच्च रहेको छ । युरोपको समग्र मुद्रास्फिति दर २.८ प्रतिशत रहेको छ भने फ्रान्सको ३.२, जर्मनीको २.७ र अमेरिकाको २.२ प्रतिशत रहेको छ ।
मुद्रास्फिति खुम्चिँदा वस्तु तथा सेवाको मूल्यमा तत्काल कमी नआए पनि वृद्धिदर भने कम हुने गर्छ ।
