गोरखा सैनिकका सन्तानलाई ठगी गरेको आरोपमा तानिए सोलिसिटर थापा

लण्डन । गोरखा सैनिकका बयस्क सन्तानलाई बेलायतको आवासीय भिसा दिलाउने क्रममा ठगी गरेको अभियोगमा बेलायतका सोलिसिटर राजु थापाविरुद्ध नेपालमा मुद्दा परेको छ ।

काठमाडौँ जिल्ला अदालतमा फागुन १ गते दिलप्रसाद लिम्बूसहित नेपाल सरकारको तर्फबाट दायर भएको मुद्दामा सूर्यकुमार नेम्वाङसहित सोलिसिटर राजु थापा र समीकाछी रोजी श्रेष्ठलाई विपक्षी बनाइएको छ ।

सो मुद्दामा फागुन २ गते २५ नम्बर इजलासमा भएको सुनुवाइमा न्यायाधीश शिवलाल पाण्डेयले नेम्वाङलाई पाँच लाख रुपियाँ धरौटीमा छोड्न आदेश दिएका छन् भने सोलिसिटर थापा र श्रेष्ठलाई पक्राउ पुर्जी जारी गर्नु वा आफैँ हाजिर हुन आएमा बयानका लागि इजलाससमक्ष पेश गर्न आदेश दिएका छन् । तोकिएको म्यादभित्र पक्राउ परी वा आफैँ हाजिर नभएमा उनीहरूको विवरण जिल्ला सरकारी वकिल कार्यालय काठमाडौँमार्फत झिकाइ रोक्का राखी नियमानुसार गरी पेश गर्न आदेश दिइएको छ ।

सोलिसिटर थापाले आदेशको पूर्णपाठ पाएपछि आफ्नो कानुनी समूहसित परामर्श गरी आवश्यक कार्य गर्ने बताए ।

थापा ब्रिटेन नेपाल लयर्स एसोसिएनका पूर्व अध्यक्ष हुन् । उनी बेलायतको नेपाली समुदायका अग्रज पनि हुन् ।