बेलायतमा आगलागीमा मृत्यु भएका दिदीबहिनीको दाहसंस्कार मंगलबार

लण्डन । बेलायतको स्कटल्याण्ड राज्यको एबरडिनमा सोमबार भएको आगलागीमा परी निधन भएका दिदीबहिनी शिक्षा र आँचल सुवेदीको मंगलबार दाहसंस्कार गरिने भएको छ ।
एबरडिनस्थित नेपलिज हिमालयन एसोसिएसनका अध्यक्ष तथा नेपाल पत्रकार महासंघ युकेका सल्लाहकार डा शिव तिवारीका अनुसार दिदीबहिनीको दाहसंस्कार मंगलबार हिन्दू परम्पराअनुसार गरिने तय भएको छ ।
घटनाको बारेमा थप जानकारी दिँदै डा तिवारी आगलागी सुवेदी दिदीबहिनी बस्ने फ्लाटभन्दा मुनी विपरीत तर्फको फ्लाटबाट शुरु भएको बताउनुभयो । सुवेदी दिदीबहिनी दोस्रो तल्लामा बस्थे भने आगलागी पहिलो तल्लामा शुरु भएको थियो ।
आगलागी भएको थाहा पाएपछि दिदीबहिनी आफ्नो फ्लाटको ढोका बन्द गरी बाहिर निस्कन खोज्दा भर्याङमै धुँवाको मुस्लोमा परी निस्सासिएर उनीहरूको मृत्यु भएको आशङ्का गरिएको छ । दुवैजनाको शरीरमा कतै जलेको पनि नपाइएको पनि डा तिवारीले जानकारी दिनुभयो ।
डा यज्ञ सुवेदीका तीन छोरीमध्ये जेठी विवाह भएर अलग्गै बस्थिन् भने दुई दिदीबहिनी बाबाआमाबाट करिब १० मिनेटको दुरीमा रहेको सो फ्लाटमा बस्ने गर्थे ।
अहिले जेठी छोरी ज्वाइँ आएर डा सुवेदी दम्पत्तिलाई सम्हाल्ने कोसिस गरिरहेका छन् ।
डा तिवारीले एसोसिएसनले सुवेदी परिवारलाई यस विषम परिस्थितिमा कसरी सहयोग गर्ने भन्ने बारेमा परिवारसित सम्पर्कमा रही छलफल गरिरहेको र सबै किसिमको सहयोगका लागि संस्था तयार रहेको बताए ।