काठमाडौँ । गोरखा भूतपूर्व सैनिककका छोराछोरीलाई बेलायत ल्याइदिन्छु भनी ठगी गरेको आरोपमा पक्राउ परेका गोरखा सैनिक अभियन्ता सूर्य नेम्वाङलाई थप पाँच दिन थुनामा राख्न अदालतले अनुमति दिएको छ ।
काठमाडौँ प्रहरीका प्रवक्ता कुमोद ढुंगेलका अनुसार काठमाडौँ जिल्ला अदालतले उनलाई थप पाँच दिन थुनामा राखी अनुसन्धान गर्न अनुमति दिएको हो ।
उनलाई पिताको काजकिरिया गर्न नेपाल गएको बखत पाँचथरबाट पक्राउ गरिएको थियो । पाँचथरबाट उनलाई काठमाडौँ ल्याइएको छ ।
नेम्वाङ बेलायतको नेपाली समाजभित्र चर्चित नाम हो । उनी गोरखा संयुक्त सत्याग्रहमा सहसंयोजकका रुपमा पनि विगतमा कार्यरत थिए । एनआरएनए युकेको पूर्व उपाध्यक्ष, नेपाली जनसम्पर्क समिति, यति नेपाली एसोसिएसन लगायतका दर्जनौँ संस्थामा उनी महत्वपूर्ण पदमा रहेर काम गरिसकेका छन् ।
नेम्वाङमाथि बेलायत ल्याउन लाखौँ पैसा असुली गरेको र फिर्ता माग्दा धम्क्याएको भन्दै काठमाडौँ प्रहरीमा २०८०
पौष २४ गते उजुरी परेको थियो ।
गोरखा अभियन्ता रहँदारहँदै उनी पछिल्लो समय पूर्व गोरखाका परिवारलाई नेपालबाट बेलायत ल्याउन कानुनी प्रक्रियामा सघाउन विभिन्न ल फर्मसित सम्पर्कमा रहेर काम गर्दै आएका छन् ।
