बेलायतमा अब विद्यार्थीलाई डिपेन्डेण्ट ल्याउन बन्द !

लण्डन । नयाँ वर्ष २०२४ को शुरुवातसँगै बेलायतले अन्तर्राष्ट्रिय विद्यार्थीहरुलाई आफ्नो पार्टनर ल्याउन बन्देज लगाएको छ ।
बेलायतको गृह मन्त्रालयका अनुसार जनवरी १ देखि अब सीमित विद्यार्थीहरुले मात्र आफ्नो डिपेन्डेण्टलाई बेलायत ल्याउन पाउने छन् । जसमा बेलायतमा विद्यावारिधि अध्ययन गर्नेहरु, अनुसन्धानात्मक अध्ययनमा आधारित स्नातकोत्तर गर्नेहरु र सरकारी छात्रवृत्तिमा छ महिना भन्दा लामो अध्ययन गर्नेहरु छन् ।
यसबाहेक अन्य विद्यार्थीहरुलाई आफ्नो डिपेन्डेण्ट ल्याउन पूर्णत बन्देज लगाइएको छ । अन्डरग्राजुयटमा सरकारी छात्रवृत्ति पाएकाबाहेक अरु विद्यार्थीलाई डिपेण्डेण्ट ल्याउन रोक लगाइएको छ ।
बेलायतले आप्रवासीको संख्या कटौती गर्न सो प्रावधान ल्याएको हो ।
यसबाट बेलायतको शैक्षिक क्षेत्रमा गम्भीर असर पर्ने आँकलन पनि गरिएको छ ।