भोजपुर प्रतिभा सम्मान हिरण्य भोजपुरे र पुरस्कार करुणा राईलाई

लण्डन । भोजपुर प्रतिभा प्रतिष्ठान बेलायतले हरेक दुई/दुई वर्षमा प्रदान गर्दै आएको प्रतिभा सम्मान र प्रतिभा पुरस्कार यस वर्षको लागि संगीतकार, गायक तथा लेखक हिरण्य भोजपुरे र कवि करुणा राईलाई प्रदान गर्ने निर्णय गरेको छ ।
सो सम्मानमा १५ हजार रुपैयाँ र ताम्रपत्र रहेको छ भने पुरस्कारमा ३५ हजार रुपियाँसहित ताम्रपत्र रहेको छ ।
संस्थाले यसअघि साहित्यकार पूर्णप्रकाश यात्री, साहित्यकार परशु प्रधान, साहित्यकार कृष्ण जोशी, साहित्यकार जीवी लुगुन, साहित्यकार शैलेन्द्र साकार, साहित्यकार मन्जुल, साहित्यकार गायक तथा संगीतकार गणेश रसिक, ईतिहासकार ज्ञानमणि नेपाल र श्याम तमोटलाई सम्मान गरिसकेको छ ।
यसैगरी, कवि श्रवण मुकारुङ, संगीतकार दिनेश वान्तवा, कवि विप्लव ढकाल, कवि विमल गिरी, धाविका मीरा राई, कवि तथा समालोचक पूर्ण ईन्फादा, गायक भीषण मुकारुङ र लेखक कविता राईलाई पुरस्कार प्रदान गरिसकेको छ ।
यस वर्षको सम्मान र पुरस्कार २०८१ साल वैशाखमा नेपालमा एक भब्य कार्यक्रमको आयोजना गरी प्रदान गरिने संस्थाले जनाएको छ ।