बेलायतमा बितेका सुरेश मगरको आफन्तलाई सम्पर्कमा आउन प्रहरीको अनुरोध

लण्डन । बेलायतमा मृत्यु भएका एक नेपाली युवाको आफन्तलाई सम्पर्क गराइदिन प्रहरीले सर्वसाधारणसँग अनुरोध गरेको छ ।
प्रहरीले ४६ वर्षीय सुरेश मगरले आत्महत्या गरेको आशंका गरेको छ र उनका नजिकका आफन्तहरुको खोजी गर्दा कोही पनि फेला नपरेका कारण उनको शव व्यवस्थापन गर्न असजिलो परेकाले सर्वसाधारणलाई उनका आफन्त खोजिदिन प्रहरीले अपील गरेको हो ।
मगर पोर्चुगिज पासपोर्टबाहक भएकाले प्रहरीले पोर्चुगलमा उनका आफन्तको खोजी गरेको र त्यहाँ कोही फेला नपरेपछि बेलायतस्थित नेपाली दुताबासलाई सहयोगका लागि पत्राचार गरेको पाइएको छ ।
दुताबासले सो कार्यमा सहयोग गर्न मगर संघ बेलायतलाई सम्पर्क गरेपछि अहिले मगर संघ युकेले सामाजिक तथा सांगठानिक सञ्जालमार्फत मगरका आफन्तहरुको खोजी कार्यलाई अघि बढाएको छ ।
दुताबासलाई प्रहरीले उपलब्ध गराएको संक्षिप्त विवरणमा मगर लण्डनमा काका काकीसित बस्दै आएको बताइएको छ । अहिले काका काकी नेपाल बिदामा गएको अवस्थामा उनको निधन भएको हो । निधन कहिले, कहाँ र कसरी भयो पनि उल्लेख गरिएको छैन ।
उनका आमाको नाम परमी मगर पिताको नाम धनीराज मगर बताइएको छ ।
उनको जन्म नेपालको कुन जिल्ला हो खुलाइएको छैन । उनको राहदानीमा जन्मस्थल नेपाल मात्र लेखिएको छ ।
उनको आफन्तका बारेमा जानकारी भएमा नेपाली दुताबास लण्डनमा ०२० ७२२९ १५९४ वा डिटेक्टिभ कन्सटेवललाई ०७९ २०१५ ५३३१ मा सम्पर्क गरी जानकारी दिन अपील गरिएको छ ।