काठमाडौँ । नक्कली भुटानी शरणार्थी प्रकरणमा प्रहरीद्वारा पक्राउ पुर्जी जारी भएका पूर्वउपप्रधानमन्त्री टोपबहादुर रायमाझी पक्राउ परेका छन् ।
प्रहरीले उनलाई काठमाडौँको बूढानीलकण्ठ क्षेत्रबाट आइतबार साँझ पक्राउ गरेको जिल्ला प्रहरी परिसर काठमाडौँका प्रमुख तथा प्रहरी वरिष्ठ उपरीक्षक दानबहादुर कार्कीले जानकारी दिए ।
नेकपा (एमाले)का सचिव समेत रहेका नेता रायमाझीलाई प्रहरीले पक्राउ पुर्जी जारी गरी खोजीको सूचीमा राखेको थियो ।
पक्राउ पुर्जी जारी हुँदा गृह जिल्ला अर्घाखाँचीमा रहेका रायमाझी प्रहरीलाई आफैँ उपस्थित हुने वचन दिएका थिए तर उनी पूर्व निर्धारित यात्रा तालिकाअनुसार काठमाडौँ नआई १० दिनदेखि लुक्दै बसिरहेका थिए ।
शुरुमा उनी एमाले अध्यक्ष केपी शर्मा ओली निवासमा लुकिरहेको आशंका गरिएको थियो । एमालेले उनलाई पदीय जिम्मेवारीबाट निलम्बन गरिसकेको छ भने संसदमा उनले बिरामी बिदाका लागि वारिसमार्फत निवेदन दिएका छन् ।
उपरीक्षक कार्कीले भन्नुभयो, “हाम्रो टोलीले उहाँलाई बूढानीलकण्ठ क्षेत्रबाट पक्राउ गरिसकेको छ ।”
रायमाझीविरुद्ध जिल्ला अदालत काठमाडौँले यही वैशाख २० गते पक्राउ पुर्जी जारी गरेको थियो ।
पक्राउ पुर्जी जारी भएदेखि नै रायमाझी फरार रहेको प्रहरीले जनाएको छ ।
सोही प्रकरणमा अनुसन्धानका लागि प्रहरीले रायमाझीका छोरा सन्दीपलाई भने यही वैशाख २० गते नै पक्राउ गरेको थियो ।
