लण्डन । बेलायतमा आज स्थानीय चुनाव हुँदैछ ।
करिब २३० वटा काउन्सिलमा ८ हजारभन्दा बढी काउन्सिलरहरु र चार मेयरहरुका लागि आजको चुनावले भाग्यको फैसला गर्नेछ।
मतदान गर्दा परिचय पत्रको व्यवस्था पहिलोपटक गरिएको छ । यसअघि मतदान गर्न जाँदा केही देखाउनुपर्ने थिएन । आजको निर्वाचनपछि भने पासपोर्ट, सवारीचालक अनुमति पत्र लगायतको परिचय पत्र देखाउनु पर्नेछ ।
बेलायतमा हरेक वर्षको मे महिनाको पहिलो विहीबार स्थानीय चुनाव हुने गरेको छ ।
आउने साल बेलायतमा आमचुनाव हुने भएकाले यसपटकको स्थानीय निर्वाचन चासोको विषय बनेको छ । सत्तारुढ कन्जरभेटिभ पार्टीले जितेका काउन्सिल गुमाउने र प्रतिपक्षी लेबरले थप काउन्सिल जित्ने आँकलन गरिएको छ । यस्तै लिबरल डेमोक्रयाट र ग्रीनले पनि थप काउन्सिलर जित्ने प्रक्षेपण गरिएको छ ।
