बेलायती राजदुतले भेटिन् नेपालका प्रधानमन्त्री

काठमाडौँ । प्रधानमन्त्री पुष्पकमल दाहाल ‘प्रचण्ड’सँग नेपालका लागि बेलायती राजदूत निकोला पोलिटले आज शिष्टाचार भेटवार्ता गर्नुभएको छ ।
प्रधानमन्त्री निवास बालुवाटारमा आज बिहान भएको सो भेटवार्तामा द्विपक्षीय सम्बन्धका विविध विषयमा विचारविमर्श भएको प्रधानमन्त्री दाहालको सचिवालयले जनाएको छ ।

उता राजदुत पोलिटले भेटपछि ट्वीट गर्दै प्रधानमन्त्री प्रचण्डलाई प्रधानमन्त्रीमा नियुक्त हुनुभएकोमा बधाई दिएको बताएकी छिन् । नेपाल र बेलायतबीच मैत्री सन्धी भएको एकसय वर्ष पुगेको अवसरमा प्राथमिकताका बारेमा छलफल गरेको उनले जानकारी दिएकी छिन् । नेपाल र बेलायत बीचको सम्बन्ध जनताबीचको आपसी सम्बन्ध, प्रजातान्त्रिक मूल्य मान्यताको साझेदारीमा आधारित रहेको बताउँदै उनले नेपालको हरित, लचिलो र समावेशी विकासमा सहयोग जारी रहने बताएकी छिन् ।