बेलायती राजाद्वारा नयाँवर्षको अवसरमा महन्त श्रेष्ठलाई पदवी

लण्डन । बेलायतका राजा चाल्र्स तृतीयले अंग्रेजी नयाँ वर्षको उपलक्ष्यमा विभिन्न व्यक्तिहरुलाई पदवी दिएका छन् जसमा बेलायतका अग्रज नेपाली महन्त श्रेष्ठ पनि परेका छन् ।
श्रेष्ठलाई अर्डर अफ ब्रिटिश इम्पायर (ओबिई) को सम्मान दिइएको छ । उनलाई समाजसेवा तथा नेपाली समुदाय र लण्डन बरो अफ इलिङमा पुर्याएको योगदानका लागि सो पदवी दिइएको बताइएको छ ।
सो पदवी घोषणापश्चात प्रतिक्रिया दिँदै श्रेष्ठले बेलायती राजाबाट सो पदवी पाउनेमा आफ्नो पनि नाम पनि समावेश भएको पाउँदा खुशी लागेको बताए । बेलायत र नेपालमा रहेका नेपालीहरु तथा आफू बसोबासरत इलिङ काउन्सिलको सहयोगका लागि पहिलेदेखि लागि परिरहेको र आगामी दिनमा पनि सहयोग गरिरहने उनले प्रतिवद्धता व्यक्त गरे ।
आफू समाजसेवामा निस्वार्थ रुपले लागेको बताउँदै उनले आफूले पाएको पदवीका लागि सबै नेपालीहरुलाई धन्यवाद दिए ।
सन् १९७६ मार्च १० का दिन २४ वर्षको उमेरमा बेलायत आएका श्रेष्ठ बेलायतको नेपाली समुदायको अग्रज मानिन्छन् । उनी करिब ४० वर्षदेखि बेलायतमा व्यवसायरत छन् । उनको नेपालीमा पनि व्यवसाय छ ।
व्यवसायका साथै उनी समाजसेवामा पनि उत्तिकै सक्रिय छन् । एनआरएनए यूकेको संस्थापक अध्यक्ष रहेका उनी पासा पुच गुठी यूके ट्रष्टीको अध्यक्ष, लन्डन चेम्बर अफ कमर्सको सदस्य, ब्रिटेन नेपाल चेम्बर अफ कमर्स (बीएनसीसी) को उपाध्यक्ष, साउथहल राम मन्दिरको ट्रष्टी र स्थानीय मेयर च्यारिटीको कमिटीमा पनि रहेर काम गरिसकेका छन् । उनी इलिङ चेम्बर अफ कमर्सको पूर्व अध्यक्ष पनि हुन् भने उनको सामाजिक सेवाका लागि वेष्ट लण्डन विश्वविद्यालयले उनलाई मानार्थ एमबीए पनि प्रदान गरेको छ ।

नयाँ बर्ष अवसरमा ११०७ जनाले विभिन्न पदवी पाएका छन् जसमा आधा महिला छन्।