किरण पुनको हत्याको आशङ्कामा पक्राउ परेका दुवै जना जमानतमा छुटे

लण्डन । बेलायतमा बेपत्ता किरण पुनको हत्याको आशङ्कामा पक्राउ परेका दुई युवा जमानतमा छुटेका छन् ।

ह्याम्पसायर प्रहरीका अनुसार फ्लीटबाट पक्राउ परेका २९ वर्षीय युवा मार्च २४ सम्मका लागि जमानतमा छुटेका छन् भने अल्डरसटबाट पक्राउ परेका अर्का ३६ वर्षीय युवा मार्च २३ सम्मका लागि जमानतमा रिहा भएका छन् ।

बेलायतको एम्सबरीमा बसोबास गर्ने ३६ वर्षीय किरण पुन डिसेम्बर १ देखि हराइरहेका छन् । प्रहरीका अनुसार उनी सबैभन्दा पछिल्लोपटक सोही दिन साँझ साढे ७ बजेतिर अल्डरसट रेलवे स्टेशन बाहिर बसबाट ओर्लेका थिए ।

डिटेक्टिभ इन्स्पेक्टर होवार्ड ब्रोडरिबले आफूहरू किरण कहाँ हुन सक्छन् वा उनीमाथि के भयो भन्ने पत्ता लगाउन निरन्तर लागि परेको बताएका छन् । उनले किरणलाई पत्ता लगाउन केही सूचना भए प्रहरीलाई दिएर सहयोग गर्न पनि अनुरोध गरेका छन् ।