अल्डरसटमा बसबाट उत्रिएका थिए किरण पुन

लण्डन । डिसेम्बर १ देखि हराइरहेका नेपाली युवा किरण पुन अल्डरसटसम्म आइपुगेको पाइएको छ ।

प्रहरीका अनुसार उनी सो दिन साँझ करिब साढे ७ बजेतिर अल्डरसट स्टेशनबाहिर बसबाट ओर्लिएका थिए । उनी सो दिन उनको निवास विल्सायर, एम्सबरीबाट अल्डरसट आएको बुझिएको छ । बसबाट ओर्लिँदै गरेको तस्वीरमा उनले भित्रपट्टि सुन्तले रङ भएको कालो ज्याकेट, कालो टोपी लगाएको र पछाडि झोला बोकेको देखिन्छ । उनले कानमा सेतो तार भएको हेडफोन सुनिरहेको पनि देखिन्छ ।

प्रहरीले उनको खोजीका लागि सर्वसाधारणमा अपील गरेको छ । उनको फार्नब्रो, अल्डरसट, बेजिङस्टोक र एण्डोभरमा पनि साथीभाइ आफन्त रहेको बताइएको छ ।  

करिब ५ फिट ८ इन्च अग्ला किरणको छोटो कालो कपाल, खैरो आँखा र चिउँडोमा खत रहेको बताइएको छ । उनको बारेमा केही जानकारी भए ह्याम्पसायर प्रहरीलाई १०१ मा फोन गरी रिफरेन्स नम्बर  44220510992 बताई जानकारी दिन सकिने छ ।