तिगेलाद्वारा निर्वाचन प्रणालीबारे जानकारी

लण्डन । राजनीतिका अध्येता विश्वासदीप तिगेलाले विश्वमा प्रचलित निर्वाचन प्रणाली र नेपालको निर्वाचन प्रणालीबारे तथ्याङ्कसहित तुलनात्मक जानकारी दिएका छन् ।

मुन्धुम एकेडेमीले काठमाडौँमा आयोजना गरेको एक कार्यक्रममा उनले विश्वका उत्कृष्ट र अप्रजातान्त्रिक निर्वाचन प्रणालीहरुको कसीमा नेपालको मिश्रित निर्वाचन प्रणालीले के के सुधार गर्न आवश्यक भन्ने विषयमा पनि तथ्यगत कारण र आधारहरु प्रस्तुत गरे । सो कार्यक्रममा राजनीतिशास्त्रका विद्यार्थी र राजनीतिकर्मीहरुको सहभागिता रहेको थियो । कार्यक्रमको अन्तमा सहभागीहरुको प्रश्नको उत्तर तिगेलाले दिएका थिए भने सुझावहरुलाई ग्रहण गरेका थिए ।

तिगेलाले उनका राजनीति शास्त्रको डिग्री तहमा तयार गर्नुभएको विश्वका निर्वाचन प्रणालीहरुमध्ये सबैभन्दा प्रजातान्त्रिक कुन हो भन्ने विषयक शोधपत्र पुस्तकको रुपमा आउनुभन्दा अगाडी छलफल र अन्तरक्रिया भएको हो ।

तिगेलाको गत वर्ष उनको माष्टर्स डिग्रीको शोधपत्र ‘ह्वाई चाइना इज नट रिप्लेसिङ अमेरिका’ नामक पुस्तक प्रकाशनमा आएको छ भने उनी क्यान्टवरी युनिभर्सिटी युकेबाट माष्टर्स डिग्री सिध्याएर विद्यावारिधिको प्रकृयामा छन् । 

एकेडेमीका संयोजक डि. बी. आङबुङले प्रस्तोता तिगेला र सहभागी सबैलाई धन्यवाद दिएका थिए ।