गोरखा समस्याबारे नेपाल र बेलायतबीच दोस्रो वार्ता नोभेम्बर २१ मा

लण्डन । गोरखा भूतपूर्व सैनिकहरुका समस्याका बारेमा नेपाल तथा बेलायत सरकारको वार्ता टोलीबीच दोस्रो वार्ता नोभेम्बर २१ मा लण्डनमा हुने भएको छ ।
सो वार्ता लण्डनस्थित नेपाली दुताबासमा दिउँसो १ बजेदेखि साढे २ बजेसम्म तय भएको वार्तामा गोरखाहरुका तर्फबाट प्रतिनिधि रहेका मेजर रिटायर्ड जुदबहादुर गुरुङले जानकारी दिनुभयो ।
यसपटकको वार्ता प्राविधिक वार्ता रहेको छ । जसमा वार्ता टोलीका संयोजकहरु बेलायती भेटेरान मन्त्री तथा नेपाली वार्ता टोलीका संयोजक रहेका बेलायतका लागि नेपाली राजदुत सहभागी हुने छैनन् । तर टोलीका अन्य सदस्यहरुले विभिन्न विषयमा छलफल गरी वार्तालाई अगाडी बढाउने छन् ।
गुरुङले सो दिनको वार्तामा आफूले गोरखाहरुका तर्फबाट वार्ताको चरणवद्ध छलफलका विषयहरु, समान पेन्सन तथा क्षतिपूर्ति माग गर्नुको पृष्ठभूमि र कारणहरु प्रस्तुत गर्ने जानकारी दिनुभयो ।
गोरखा भूतपूर्व सैनिकहरु बेलायती समकक्षीसरह पेन्सनको माग गर्दै लामो समयदेखि आन्दोलित छन् र उनीहरुले दुई सरकारबीच वार्ता हुनुपर्ने माग गर्दै अनसन पनि बसेका थिए । लामो समयको माग पछि यही नोभेम्बर ३ मा पहिलो वार्ता शुरु भएको थियो । त्यसको तीन साता नबित्दै वार्ताको अर्को मिति तोकिनुले केही सकारात्मक आशा गर्न सकिन्छ कि भन्ने प्रश्नमा गुरुङले भन्नुभयो, “बेलायत सरकारको गोरखाहरुलाई समान पेन्सन तथा क्षतिपूर्ति दिने विचार देखिँदैन । अहिले अलिकति वार्ताको ढोका खुलेको छ । त्यसलाई ठेलेको ठेलेकै गरेर दबाब दिने हो भने असम्भव पनि केही छैन ।”