लिज ट्रस राजनीतिमै रहने

लण्डन । बेलायतका प्रधानमन्त्री लिज ट्रसले पदबाट राजिनामा पछि पनि आफू राजनीतिमा सक्रिय रहने बताएकी छिन् ।

आज बिहान अन्तिम मन्त्रिपरिषद्को बैठकपछि प्रधानमन्त्री कार्यालय छोड्नुअघि गरेको छोटो सम्बोधनमा उनले आफू अब आफ्नो निर्वाचन क्षेत्रमा सक्रिय हुने बताएकी हुन् । उनले संसदमा ब्याकबेन्चरका रुपमा प्रस्तुत हुने पनि बताइन् ।

आफ्नो कार्यकालमा सहयोग गर्ने सबैलाई धन्यवाद दिँदै उनले आफ्नो छोटो कार्यकालमा न्याशनल इन्स्योरेन्स घटाएको, उर्जाको चर्को मूल्यबाट आहत जनतालाई सहयोग गरेको र धेरै मानिसलाई टाट पल्टनबाट बचाएको बताइन् ।

उनले आजै नियुक्त हुन लागेका नयाँ प्रधानमन्त्री ऋषि सुनकलाई शुभकामना दिँदै युक्रेनलाई गर्दै आएको सहयोग जारी राख्न सुझाव दिइन् ।

सम्बोधनपछि उनी श्रीमान र दुई छोरीसहित राजा चार्ल्स तृतीयसमक्ष राजिनामा पेश गर्न राजदरबार प्रस्थान गरेकी छिन् ।

लिज ट्रससँगै अब बेलायती संसदमा तीन पूर्व प्रधानमन्त्रीहरु ब्याकबेन्चरको भूमिकामा रहनेछन् ।