बेलायतमा नयाँ प्रधानमन्त्री अर्को साता निर्वाचित हुने

लण्डन । बेलायतमा प्रधानमन्त्री लिज ट्रसले आज राजिनामा दिएपछि रिक्त प्रधानमन्त्री पदमा आगामी साताभित्रमा नयाँ प्रधानमन्त्री चयन हुने भएको छ ।

सत्तारुढ कन्जरभेटिभ पार्टीको नयाँ नेता चयनका लागि जिम्मेवार १९२२ समिति र पार्टीका अध्यक्ष जेक बेरीले अन्य अवस्थाको नेता चयन हुने प्रक्रियालाई छोट्याई एक सातामै नयाँ नेता चयन हुने बाटो तय गरेका हुन् ।

१९२२ समितिका संयोजक सर ग्राहम ब्राडीका अनुसार सोमबार नयाँ नेता बन्न चाहनेहरुले मनोनयन गर्नुपर्नेछ । नेता बन्न मनोनयनका लागि कम्तीमा १०० जना सांसदको समर्थन चाहिने छ । नयाँ व्यवस्थाका कारण बढीमा ३ जना भन्दा बढी आकांक्षी रहने छैनन् ।

अन्तिम दुई उम्मेदवारबीच पार्टीका सदस्यहरुबीच अनलाइन माध्यमबाट मतदान गराइनेछ । तर अनलाइन पहुँच नभएकाहरुलाई कसरी व्यवस्थापन गर्ने प्रष्ट भइसकेको छैन ।

नयाँ नेताको घोषणा अक्टोबर २८ तारिख हुनेछ ।

बेलायतमा संसदभित्र बहुमत नगुमाएसम्म सत्तारुढ पार्टीभित्रबाटै प्रधानमन्त्री चयन हुने व्यवस्था छ । नयाँ निर्वाचित हुने प्रधानमन्त्रीले बाँकी कार्यकालका लागि कार्यभार सम्हाल्ने छन् ।

नयाँ प्रधानमन्त्रीका लागि यसअघि प्रतिस्पर्धामा रहेका ऋषि सुनक, पेन्नी मोर्डन्ट, सुयला ब्रेभरम्यान, केमी बेडोनाकका साथै पूर्व प्रधानमन्त्री बोरिस जोन्सनको पनि नाम चर्चामा छ । तर वर्तमान अर्थमन्त्री जेरेमी हन्टले भने दौडमा भाग नलिने बताएका छन् ।