बेलायती अर्थमन्त्री क्वाजी क्वाटेङ बर्खास्त

लण्डन । नियुक्त भएको डेढ महिना पनि नपुग्दै बेलायतका अर्थ मन्त्री क्वाजी क्वाटेङ बर्खास्त भएका छन् ।

अमेरिका भ्रमणमा रहेका क्वाटेङलाई अचानक बेलायत फिर्ता बोलाई शुक्रबार प्रधानमन्त्री लिज ट्रसले पदबाट बर्खास्त गरेकी हुन् ।

सेप्टेम्बरको पहिलो साता अर्थ मन्त्रीमा नियुक्त भएका क्वाटेङ पहिलोपटक सार्वजनिक गरेको मिनी बजेटमा राखिएका नीतिहरुका कारण आलोचित बनेका थिए ।

उनले बेलायतको अर्थतन्त्र वृद्धि गर्दे भन्दै कर कटौतीको नीति अवलम्बन गरेका थिए भने पूर्ववत अर्थ मन्त्रीले तय गरेका आर्थिक नीतिहरुलाई रद्द गराएका थिए । उर्जाको बढ्दो मूल्यबाट जनतालाई राहत दिन प्याकेज घोषणा गरेपनि त्यसको पूर्ति कहाँबाट गर्ने भन्ने कुनै स्रोत पनि देखाउन उनले सकेका थिएनन् ।

उनको यस नीतिका कारण बेलायती स्टर्लिङ पाउण्डको अबमूल्यन भएको थियो भने पेन्सन कोष लगायतलाई सुरक्षित गर्न केन्द्रीय बैँकले पटकपटक हस्तक्षेप गर्नु परेको थियो ।

नयाँ सरकारको आर्थिक नीतिका कारण बेलायतको मोर्गेज बजार अस्तब्यस्त बनेको छ । ब्याजदरमा देखिएको अस्थिरताका कारण धेरै बैँक तथा वित्तीय संस्थाहरुले तय भइसकेको कर्जा पनि रद्द गर्दा लाखौँ मानिसहरु मर्कामा परेका छन् ।

क्वाटेङको आर्थिक नीतिको अन्तर्राष्ट्रिय मुद्रा कोषले समेत आलोचना गरेको छ । यस्तै उनका आर्थिक नीतिका कारण बेलायतको कन्जरभेटिभ पार्टीको सरकार नै धरापमा परेको छ । मत सर्भेक्षणहरुमा विपक्षी लेबर पार्टीभन्दा सत्तारुढ कन्जरभेटिभ पार्टी धेरै पछि देखिएको छ ।

यसअघि पनि सरकारमा विभिन्न जिम्मेवारी वहन गरिसकेका क्वाटेङ प्रधानमन्त्रीको लामो समयदेखिको मित्र हुन् । उनले प्रधानमन्त्री ट्रससित पुस्तक समेत लेखेका छन् ।