के के घोषणा भयो बेलायतको मिनी बजेटमा आज ?

बेलायती अर्थमन्त्री क्वासी क्वाटेङ

लण्डन । बेलायतमा यसै महिना गठन भएको नयाँ सरकारका अर्थमन्त्री क्वासी क्वाटेङले आज संसदमा मिनी बजेट पेश गरेका छन् ।

बजेटमा उनले मुख्यत दुई क्षेत्रमा जोड दिएका छन् । पहिलो आयकर । जसमा उनले विगतमा १२ हजार ५७१ पाउण्डदेखि ५० हजार २७० पाउण्डसम्म वार्षिक आय हुने व्यक्तिलाई २० प्रतिशत आयकर लगाइँदै आएकोमा १ प्रतिशत घटाइ १९ प्रतिशत कायम गरेका छन् । जुन आगामी आर्थिक वर्ष (१ अप्रिल २०२३) देखि लागू हुनेछ । यसबाट करिब ३ करोड १० लाख मानिसले वार्षिक १७० पाउण्ड जोगाउने सरकारको अनुमान छ । उता ५० हजार २७१ देखि १ लाख ५० हजार पाउण्डसम्म वार्षिक आय हुनेहरुका लागि आगामी आर्थिक वर्षदेखि ४५ प्रतिशत आयकर लगाउने पूर्व निर्णयलाई मिनि बजेटमा खारेज गरिएको छ र उनीहरुङ्का लागि पूर्ववत ४० प्रतिशत आयकर कायम गरिएको छ । यसबाहेक यसअघि लगाइएको हेल्थ एण्ड सोसल लेभीलाई यही नोभेम्बर महिनादेखि हटाइएको छ भने कर्पोरेट ट्याक्स १९ प्रतिशताट २५ प्रतिशत बनाउने पूर्व निर्णय पनि रद्द गरिएको छ।

बजेटमा जोड दिइएको अर्को विषय हो प्रोपर्टी । यसअघि पहिलोपटक घर किन्नेहरुलाई ५ लाख पाउण्डसम्मको घर किन्दा ३ लाख पाउण्डमा स्ट्याम्प ड्यूटी लाग्दैनथ्यो । मिनि बजेटमा त्यसलाई बढाई ६ लाख २५ हजार पाउण्डसम्मको घर किन्दा ४ लाख २५ हजार पाउण्डमा स्ट्याम्प ड्यूटी नलाग्ने बनाइएको छ । यसका साथै पहिले आवासीय घर किन्दा १ लाख २५ हजार पाउण्डसम्ममा स्ट्याम्प ड्यूटी नलाग्नेमा त्यसलाई बढाई २ लाख ५० हजार पाउण्डसम्ममा स्ट्याम्प ड्यूटी नलाग्ने बनाइएको छ ।

बेलायतमा वित्तीय परामर्श सेवा दिँदै आएको ए स्टार फाइनान्सियल सोल्युसन्सका प्रिन्सिपल मिन दर्लामीमगर मिनी बजेटको स्ट्याम्प ड्यूटीसम्बन्धी प्रावधानले पहिलोपटक घर किन्न चाहनेहरुलाई प्रत्यक्ष लाभ दिने बताउनुहुन्छ । अहिले बेलायतको अर्थतन्त्र अनौठो मोडबाट गुज्रिरहेको बताउँदै दर्लामीले बजारलाई चलायमान बनाउन सरकारले प्रोपर्टीसम्बन्धी नयाँ प्रावधानहरु ल्याएको विश्लेषण गर्नुभयो । यसअघि पनि कोरोना महामारीका बेला सरकारले प्रोपर्टी मार्केटलाई चलायमान बनाउन विभिन्न योजना ल्याएको उहाँले स्मरण गराउनु भयो ।

बेलायतमा वित्तीय परामर्श दिँदै आएको पीपल ग्रुपका प्रबन्ध निर्देशक सूर्यप्रकाश गुरुङ सरकारको नयाँ नीतिबाट पहिलोपटक घर किन्नेहरुलाई करिब ६ हजार पाउण्ड प्रत्यक्ष लाभ हुने बताउनुहुन्छ । साथै प्रोपर्टीमा लगानी गर्न चाहने, एउटा घर बेचेर अर्को ठाउँमा घर किनेर सर्नेहरुलाई पनि यसबाट फाइदा पुग्ने उहाँको विचार छ । उनीहरुले करिब २ हजार ५०० पाउण्ड बचाउन सक्ने गुरुङको प्रारम्भिक आँकलन छ । बेलायत आर्थिक मन्दीमा जान लागेको, ब्याज दर वृद्धिले गर्दा प्रोपर्टी मार्केट ओरालो लाग्छ कि भनेर सरकारले सहुलियतपूर्ण योजनाहरु ल्याएको गुरुङको विश्लेषण छ ।

प्रतिक्रिया

सम्बन्धित सामाग्री