बेलायतद्वारा चिनियाँ राजदूतसँग स्पष्टिकरण

लण्डन । बेलायतले बुधबार बेलायतका लागि चिनियाँ राजदूत झेङ जेगुआङलाई विदेश मन्त्रालयमा बोलाई बेइजिङको ‘आक्रामक व्यवहार’ र हालैका दिनमा ताइवानलाई लक्षित गरी गरिएका गतिविधि ‘बढेको’ बारे स्पष्टीकरण लिएको छ ।
बेलायती विदेशमन्त्री लिज ट्रसले ताइवानको हवाई क्षेत्रमा चिनियाँ क्षेप्यास्त्र प्रक्षेपण र घुसपैठबारे जानकारी दिन आफूले राजदूत झेङ जेगुआङसँग छलफल गरी जानकारी लिएको बताउनुभएको छ ।
गत साता अमेरिकी प्रतिनिधि सभाकी सभामुख न्यान्सी पेलोसीले उक्त टापुको भ्रमण गरेपछि सैन्य अभ्यास सुरु भएको थियो ।
‘बेलायत र साझेदारहरूले ताइवान वरपरको क्षेत्रमा चीनको गतिविधि वृद्धिको आलोचना गरेका छन्, जुन हाम्रो हालैको जी–७ वक्तव्यबाट देखिएको छ,” ट्रसले जारी गरेको विज्ञप्तिमा भनिएको छ । “मैले चिनियाँ राजदूतलाई बोलाएर आफ्नो देशको गतिविधिबारे स्पष्ट पार्न निर्देशन दिएँ”, विज्ञप्तिमा भनिएको छ, “हामीले हालैका महिनाहरूमा बेइजिङको तर्फबाट बढ्दो आक्रामक व्यवहार र भनाइ देखेका छौं, जसले यस क्षेत्रको शान्ति र स्थिरतालाई खतरामा पारेको छ ।”
उता लण्डनस्थित चिनियाँ दुताबासले भने राजदुत जेगुआङले विदेश मन्त्रालयमा पुगी बेलायतको गैरजिम्मेदार भनाइको खण्डन गरेको र बेलायतको तथाकथित चिनियाँ सैन्य अभ्यासप्रतिको चासोका बारेमा असहमति व्यक्त गरेको बताएको छ ।