काठमाडौँ । नेपालमा स्थानीय तहका प्रतिनिधिहरु चयनका लागि निर्वाचन सम्पन्न भएको ११ दिन भइसक्दा अझै मतगणना सम्पन्न हुन सकेको छैन ।
निर्वाचन आयोगका अनुसार अझै १२ पालिकाको अन्तिम मतपरिणाम आउन बाँकी छ ।
कुल ७५३ स्थानिय तहहरुमध्ये हालसम्म ४६० गाउँपालिकाका र २७९ नगरपालिकाको अन्तिम नतिजा सार्वजनिक भएको आयोगले जनाएको छ ।
मतगणना सम्पन्न हुन बाँकी स्थानीय निकायहरुमा काठमाडौँ, पोखरा र ललितपुर महानगरपालिका, तुलसीपुर उपमहानगरपालिका, उदयपुरको कटारी र त्रियुगा नगरपालिका, रौतहटको गढीमाई, गरुडा र फतुवा विजयपुर नगरपालिका, रुपन्देहीको तिलोत्तमा नगरपालिका, कपिलवस्तुको महाराजगन्ज नगरपालिका र बाजुराको बूढीगंगा गाउँपालिका छन् ।
काठमाडौँ महानगरमा स्वतन्त्र उम्मेदवार बालेन्द्र साह, ललितपुरमा कांग्रेसका चिरिबाबु महर्जन, पोखरामा नेकपा (एकीकृत समाजवादी)का धनराज आचार्य र तुलसीपुर उपमहानगरपालिकामा नेकपा (एमाले)का टीकाराम खड्का मतगणनामा अगाडि छन् ।
निर्वाचन आयोगले मत गणनामा लगाएको समयलाई लिएर उसको आलोचना भइरहेको छ ।
