टोकियो । एसियाको भ्रमणमा रहेका अमेरिकी राष्ट्रपति जो बाइडेनले सोमबार इन्डो-प्यासिफिक इकोनोमिक फ्रेमवर्क फर प्रोस्परिटी (आइपिइएफ) को छलफलको शुरुवात गरेका छन् ।
जापानको टोकियोमा भारतका प्रधानमन्त्री नरेन्द्र मोदीलगायत एक दर्जन राष्ट्रका प्रतिनिधिहरुसित उनले सो अवधारणका बारेमा प्रारम्भिक छलफल गरेका छन् ।
विश्वबजारमा चीनको बढ्दो सुरक्षा दबदबालाई कम गराउन अमेरिकाको पहलमा इण्डो प्यासिफिक रणनीतिको अवधारणा आएको हो । बाइडेनको यो कदमसँगै अब चीनलाई सामरिक क्षेत्रमा मात्र होइन व्यापारिक क्षेत्रमा पनि इण्डो प्यासिफिक रणनीतिले घेर्ने योजना खुलासा भएको छ । यस क्षेत्रले विश्वको कूल ग्राहर्स्थ उत्पादनको ४० प्रतिशत ओगट्दछ ।
राष्ट्रपति बाइडेनले इन्डो-प्यासिफिकको लागि स्वतन्त्र, खुला, सुरक्षित र साथै लचिलो आर्थिक दृष्टिकोण आवश्यक रहेको बताए । त्यसका लागि दिगो आर्थिक वृद्धि र समावेशिता अपरिहार्य रहेको पनि उनले उल्लेख गरे । “हामी २१ औं शताब्दीको अर्थतन्त्रका लागि नयाँ नियमहरू लेखिरहेका छौं। हामी हाम्रा सबै देशको अर्थतन्त्र द्रूत र निष्पक्ष बनाउन गइरहेका छौँ”, उनले भने ।
आईपीईएफले संयुक्त राज्य अमेरिका र यसका सहयोगीहरूलाई अमेरिकी कामदारहरू, साना व्यवसायहरू र पशुपालकहरूले इन्डो-प्यासिफिक क्षेत्रमा प्रतिस्पर्धा गर्न सक्ने अवसरको सुनिश्चितता गर्नेछ।
जापानको टोकियोमा राष्ट्रपति बाइडेनले अष्ट्रेलिया, ब्रुनाई, भारत, इन्डोनेसिया, जापान, कोरिया गणतन्त्र, मलेसिया, न्युजिल्याण्ड, फिलिपिन्स, सिंगापुर, थाइल्याण्ड र भियतनामका प्रतिनिधिहरुसँग छलफल गरेका थिए ।
कार्यक्रमको उद्घाटन सत्रमा बोल्दै भारतका प्रधानमन्त्री नरेन्द्र मोदीले यस पहलका लागि बाइडेनलाई बधाइ दिएका थिए । “भारतले समावेशी र लचिलो इन्डो-प्यासिफिक इकोनोमिक फ्रेमवर्कको लागि काम गर्ने र यसका लागि विश्वास, पारदर्शिता र समयवद्धता प्रमुख सवाल हो,” मोदीले भने यो ।
जापानका प्रधानमन्त्री किसिदा फुमिको र मोदीबाहेकका अन्य राष्ट्रका प्रतिनिधिहरुको भने भर्चुअल उपस्थिति रहेको थियो ।
चीनसित गहिरो व्यापारिक साझेदारी भएका यी मुलुकहरु सहभागी यस पहलको चीनले कसरी प्रतिक्रिया दिने हो त्यो भने हेर्ने बाँकी नै छ ।
