राजविराज । डाक्टर सिके राउत नेतृत्वको पार्टीले सप्तरीको बलान विहुल गाउँपालिकाको अध्यक्ष र उपाध्यक्ष पदमा जितेको छ ।
अध्यक्ष पदमा खेमचन्द्र यादवले दुई हजार ९९४ मत प्राप्त गरी निर्वाचित हुनुभएको छ । उहाँका प्रतिद्वन्द्वी नेपाली कांग्रेसका नवीनकुमार झाले दुई हजार २४७ मत प्राप्त गर्नुभयो ।
यसैगरी, उपाध्यक्ष पदमा पनि जनमत पार्टीका रेणु यादव दुई हजार ६९० मत ल्याएर निर्वाचित हुनुभएको छ । उहाँका निकटतम प्रतिद्वन्द्वी कांग्रेसकै आशदेवी मण्डलले दुई हजार ३०४ मत प्राप्त गर्नुभएको निर्वाचन अधिकृत कार्यालयले जनाएको छ ।
यसबाहेक पनि तराईका विभिन्न स्थानिय निकायमा सिके राउतको पार्टीले अग्रता लिइरहेको छ ।
यसैगरी, कैलालीको जोशीपुरमा रेशम चौधरीकी श्रीमतीको अध्यक्षताको नागरिक उन्मुक्ति पार्टीले विजय हासिल गरेको छ ।
अध्यक्षमा चित्रबहादुर चौधरी विजयी हुनुभएको छ । चौधरीले ४ हजार ९०३ मत प्राप्त गरी विजयी हुनुभएको हो । उहाँले नेपाली कांग्रेसका वंशराम बडायकलाई पराजित गर्नुभएको हो ।
उपाध्यक्षमा नागरिक उन्मुक्ति पार्टीकै रेखादेवी कठरिया ४ हजार ५८१ मत प्राप्त गरी विजयी हुनुभएको छ ।
यसबाहेक कैलालीका अन्य स्थानिय निकायमा पनि रेशम चौधरीको पार्टी अग्रस्थानमा छ ।
