बेलायतमा सातौँ वातावरण साहित्य गोष्ठी जुन ५ मा हुँदै

लन्डन । पर्यावरण (इको) साहित्यलाई प्रबर्धन गर्दै आएको विश्व नेपाली साहित्य महासंघ, दक्षिण यूकेले यस वर्ष पनि वातावरण साहित्य गोष्ठी आयोजना गर्ने भएको छ ।
विश्व वातावरण दिवसका अवसर पारेर आगामी जून ५ तारिखमा महासंघले एक दिने वातावरण साहित्य गोष्ठी कार्यक्रम आयोजना गर्न लागेको हो ।
महासंघको शुक्रबार सम्पन्न कार्य समितिको बैठकले जून ५ तारिख आइतबारका दिन सातौँ वातावरण साहित्य गोष्ठी गर्ने निर्णय गरेको अध्यक्ष विजय हितानले बताए ।
सन् २०१६ देखि यूकेमा नियमित रूपमा हुँदै आएको वातावरण गोष्ठीलाई निरन्तरता दिँदै यस वर्ष पनि इको साहित्यका बारेमा चर्चा परिचर्चासहित पर्यायवरणीय सिर्जना वाचन कार्यक्रम राखिने उनले बताए । ‘इको साहित्यलाई थप व्यापक बनाउन हामीले वातावरण साहित्य गोष्ठी गर्दैछौँ । यस वर्ष सातौँ संस्करण भर्चुअल रूपमा जुममा हुँदैछ,’ कार्यक्रम संयोजक समेत रहेका हितानले भने, ‘पर्यावरण साहित्यबारे चर्चा चल्नेछ । त्यस्तै, बेलायत र अन्य मुलुकबाट जम्मा भएका साहित्यकारहरूले इको सिर्जना सुनाउनेछन् ।’
चर्चित कवि एवम् सञ्चारकर्मी विमला तुम्खेवालाई प्रमुख अतिथिका रूपमा गोष्ठीमा निम्त्याइने उनले जनाए । त्यस्तै, पर्यावरण र नारीकेन्द्रित समालोचना पुस्तकका लेखक डा. गीता त्रिपाठी र पर्यावरण साहित्यमा विद्यावारिधि तहमा अध्ययन गर्दै गरेका हरिप्रसाद काफ्लेलाई वक्ताका रूपमा बोलाउने तयारी गरिरहेको हितानले जानकारी दिए ।
सन् १९७४ बाट मनाउन थालिएको विश्व वातावरण दिवस प्रत्येक वर्ष जून ५ मा मनाइन्छ ।
कार्यक्रमका दिन महासंघले तयार पार्दै गरेको आधा दर्जन बढी इको गीतहरूको सार्वजनिकीकरण हुने सचिव अमित थेवेले बताए । उनका अनुसार उपाध्यक्ष समेत रहेका संगीताकार थिर थापा मगरले उक्त परियोजनालाई संयोजन गरिरहको र विश्व वातावरण दिवसका दिन गीतहरू सार्वजनिक गरिने जनाए ।
त्यसैगरी, गत वर्षको जून ५ र ६ मा आयोजित दुई दिने छैटौँ वातावरण साहित्य गोष्ठीमा सहभागी सर्जकहरूमध्ये उत्कृष्ट ठहरिएका दुई जनालाई वातावरण साहित्य पुरस्कार प्रदान गरिनेछ । इको मुक्तक वाचनमा काठमाडौँकी सीता भण्डारी कणेल र संखुवासभा घर भई जापानमा रहेकी सयपत्री थुलुङ उत्कृष्ट मुक्तककार घोषित भएकी थिइन् । उनीहरूलाई जनही दस हजार रूपैयाँ र प्रमाणपत्र समेत प्रदान गरिनेछ । गत वर्ष करिब छ दर्जन बढी सर्जकहरूले इको सिर्जना वाचन गरेका थिए ।
महासंघको बैठकमा सल्लाहकारहरू विश्वासदीप तिगेला, औतारी साइँला गुरुङ, गणेश पुन, सहसचिव लाहाङ चेम्जोङ, मिडिया सचिव विश्वजीत थापाको सहभागिता रहेको थियो ।

प्रतिक्रिया

सम्बन्धित सामाग्री