सत्याग्रहका संयोजक कृष्णबहादुर राई र गेसो सभापति कृष्णकुमार राई (चश्मा लगाएका)
लण्डन । गोरखा सैनिकका समस्याका बारेमा नेपाल र बेलायतबीच सरकार स्तरमा वार्ता हुन लागिरहेको बेलामा गोरखा भूतपूर्व सैनिकहरुको मुख्य दुई संस्था कार्यगत एकता र सहकार्यको नजिक पुगेका छन् ।
विगतमा अधिकांश समय अलग-अलग आन्दोलनमा होमिएका गोरखा भूतपूर्व सैनिक संघ (गेसो) र गोरखा सत्याग्रह संयुक्त संघर्ष समिति सहकार्यका लागि तयार भएका हुन् ।
ती दुई संस्थाका प्रमुख र केन्द्रीय समितिबीच पटकपटक एकल र सामूहिक छलफल भएको छ । उनीहरु बीच केही दिनमै समझदारी पत्रमा हस्ताक्षर हुने स्रोतले बतायो ।
गेसोका सभापति कृष्णकुमार राई र सत्याग्रहका संयोजक कृष्णबहादुर राई बीच नेपालमै पटक-पटक एकल र सामूहिक वार्ता भएको छ भने बेलायतका लागि नवनियुक्त राजदुत ज्ञानचन्द्र आचार्यलाई भेट्न पनि दुवैजना संयुक्त रुपमा पुगेका थिए । त्यति मात्र होइन दुवै संस्थाले नेपालको परराष्ट्र मन्त्रालयमा पनि संयुक्त ज्ञापन पत्र बुझाएका छन् भने गतहप्ता मात्र दुवै कृष्ण नेपालबाट बेलायत आएका छन् । त्यो पनि एउटै फ्लाइटमा र सँगै यात्रा गरेर ।
स्रोतका अनुसार दुई संस्थाबीच विगतका कुराहरु नकोट्याउने, विगतमा कसले के कति गर्यो भन्ने इतिहासको जिम्मा छोड्ने सहमति भएको छ भने दुई सरकारबीच अब हुने वार्तामा दुवै संस्था सहकार्य गरेर प्रस्तुत हुने पनि सहमति भएको छ । ‘वार्ता समितिमा को पर्यो परेन भन्ने महत्वपूर्ण कुरा होइन, वार्तालाई कसरी सफल बनाउने ठूलो कुरा हो’ छलफलमा सहभागी एक नेताले भने ।
समझदारी पत्रमा हस्ताक्षर भएपछि अब गेसो र सत्याग्रहको एकल कार्यक्रम आयोजना हुने छैन । दुवैले संयुक्त रुपमा कार्यक्रम आयोजना गर्ने छन् । यसबाट गोरखाहरुमा एकता र सकारात्मक सन्देश जाने उनीहरुको विश्वास छ ।
‘विगतमा गोरखाहरु छिन्नभिन्न हुँदा बेलायतले फाइदा उठाएको कारण दुई संस्था सहकार्य गरी वार्ताबाट गोरखाहरुको पक्षमा अधिकतम उपलब्धि हासिल गर्नुपर्छ भन्ने मान्यताबाट सहकार्य हुन लागेको हो’, ती नेताले भने ।
दुई संस्थाहरु प्राविधिक समितिको १३ बुँदे प्रतिवेदनलाई सहमतिको जग बनाउन राजी भएका छन् ।
गेसोले विकसित नयाँ परिस्थितिका बारेमा केन्द्रीय समितिको बैठक राखेर सहकार्यका लागि अघि बढिसकेको बुझिएको छ भने सत्याग्रहको बैठकले सहकार्यका लागि म्याण्डेट दिएपछि लिखित रुपमा सहकार्य अघि बढ्ने छ ।
गोरखा संस्थाहरुबीच विकसित नयाँ समीकरणका बारेमा नवनियुक्त राजदुत आचार्यलाई पनि जानकारी भइसकेको र उनी पनि खुशी भएको बुझिएको छ ।
