नयाँ भेरियन्ट रोक्न बेलायतमा सार्वजनिक यातायात र पसलमा मास्क अनिवार्य

लण्डन । कोभिडको नयाँ भेरियन्ट बेलायतमा पनि भेटिएपछि नियमहरु परिवर्तन गरी कडाइ गरिएको छ ।

बेलायतको चेम्सफोर्ड र नट्टिङघममा नयाँ भेरियन्ट फेला परेपछि बेलायती प्रधानमन्त्री बोरिस जोन्सनले शनिबार साँझ पत्रकार सम्मेलन गरी भाइरस नियन्त्रणका लागि नयाँ नियमहरु जारी गरेका हुन् ।

उनले बेलायत आइपुग्ने सबै यात्रुहरुले आइपुगेको दोस्रो दिन पीसीआर टेष्ट गर्न पर्नेछ । यदि उनीहरुमा पोजिटिभ भेटिएमा नेगेटिभ रिजल्ट नआएसम्म आइसोलेसनमा बस्न पर्ने छ ।

यस्तै, नयाँ भाइरसको शंका गरिएका व्यक्तिहरुले पूरै भ्याक्सिन लगाए पनि १० दिनसम्म सेल्फ आइसोलेसनमा बस्न पर्नेछ । एनएचएसको टेष्ट एण्ड ट्रयासले उनीहरुलाई नियमित निगरानीमा राख्नेछ ।

यसैगरी, अर्को सातादेखि सार्वजनिक यातायात र पसलहरुमा मास्क लगाउन अनिवार्य गरिएको छ तर पव तथा रेष्टुराँहरुमा भने लगाउनु पर्ने छैन ।

यस्तै, बेलायतको ज्वाइन्ट कमिटी अन भ्याक्सिनेसन एण्ड इम्युनाइजेसन (जेसीभीआइ) ले दोस्रो खोप र बुस्टर डोज लगाउने समयावधि तथा कम उमेरकालाई पनि बुस्टर खोप दिने बारे निर्णय गर्ने बताइएको छ ।