लण्डन । उर्जाको मूल्य बढ्दा बेलायतमा तीन महिनाको अवधिमा २४ वटा उर्जा कम्पनी बन्द भएका छन् ।
सेप्टेम्बर २०२१ देखि नोभेम्बरको दोस्रो साता सम्ममा दुई दर्जन कम्पनी बन्द हुनाले करिब २० लाख उपभोक्ता प्रभावित बनेका छन् । नोभेम्बरको दुई सातामा मात्र आठ वटा उर्जा कम्पनी बन्द भएका छन् ।
उपभोक्ताहरुलाई बेलायतको उर्जा नियामक कम्पनी अफजेमले अर्को कम्पनीमा अस्थायी रुपमा स्थानान्तर गरेको छ तर उपभोक्ताहरुले पहिले आफूले रोजेको कम्पनीले उपलब्ध गराएको दररेटभन्दा बढी मूल्य चुकाउनु परेको छ ।
यस वर्षको शुरुवातदेखि नै बेलायतमा बिजुली र ग्याँस दुवैको भाउ बढिरहेको छ र अझै जर्मनीको नियामक कम्पनीले हालसालै रसियाबाट बाल्टिक क्षेत्र हुँदै युरोप आउने सीधा ग्याँस लाइनलाई अनुमति नदिएपछि यो संकट अझै गहिरिने देखिन्छ । किनकी अन्य मार्गबाट ग्याँसको अतिरिक्त आपूर्ति बढाउन रसिया राजी भएको छैन ।
उर्जा संकट बढ्दै जाँदा बेलायतमा अरु पनि उर्जा कम्पनीहरु बन्द हुने र उपभोक्ताहरुलाई अझै मर्का पर्ने विश्लेषण गरिएको छ । हालसम्म बन्द भएकामा धेरैजसो साना कम्पनीहरु छन् । यो वर्षको अन्त्यसम्ममा कम्तीमा अरु १० कम्पनी बन्द हुने आँकलन गरिएको छ ।
उर्जा कम्पनी बन्द भएका उपभोक्ताहरुलाई अहिले स्थानान्तरण गरिएको कम्पनीबाट अरुतिर नजान अफजेमले सुझाव दिएको छ । अफजेमले सस्तो प्याकेज आफैँले खोजेर त्यस्ता उपभोक्तालाई दिने बताएको छ । वर्तमान प्रावधानअनुसार अफजेमले सस्तो मूल्यमा बन्द भएका उर्जा कम्पनीका उपभोक्ता लिन उर्जा कम्पनीहरुसित प्रतिष्पर्धा गराउने गर्छ र त्यसबाट उपभोक्तालाई फाइदा पुग्ने अनुमान छ ।
विज्ञहरुले गत वर्षको दाँजोमा यसवर्ष प्रति घर उर्जाको मूल्य २०० पाउण्ड बढिसकेको र आउँदो अप्रिलसम्ममा वृद्धि ४०० पाउण्डसम्म पुग्ने भएकाले अफजेमलाई थप राहत प्याकेज ल्याउन अनुरोध गरेका छन्।
