लिभरपुलको ट्याक्सी विष्फोटमा यात्रुको संलग्नता

लण्डन । लिभरपुर वुमन्स अस्पतालको प्रवेशद्वारमा आइतबार भएको ट्याक्सी विस्फोटमा सो ट्याक्सीमा यात्रारत यात्रुको संलग्नता रहेको प्रहरीले बताएको छ ।

ती यात्रुको मृत्यु भएको छ भने प्रहरीले सो घटना आतङ्कवादसित सम्बन्धित रहेको बताएको छ । मृतकको नाम भने प्रहरीले सार्वजनिक गरेको छैन ।

प्रहरीका अनुसार यात्रुले सो अस्पतालमा ट्याक्सी रोकिनासाथ आफूसित रहेको विष्फोटक पदार्थ पड्काएका थिए । उनले घटनास्थलबाट करिब १० मिनेट टाढाको रटल्याण्ड आभेन्यूबाट ट्याक्सी चढेको पाइएको छ ।

प्रहरीले घटनामा संलग्नहरुका बारेमा पत्ता लागिसकेको बताएको छ ।

घटनामा प्रयोग भएको ट्याक्सीका चालक भने अस्पतालबाट सोमबार डिस्चार्ज भएका छन् ।

प्रहरीले सो घटनामा संलग्न रहेको आशंकामा अर्का एक जना २० वर्षीय युवालाई पनि पक्राउ गरेको छ । यसअघि आइतबार नै अरु तीन जनालाई नियन्त्रणमा लिइएको छ ।

बेलायतभर आइतबार विभिन्न युद्धहरुमा ज्यान गुमाएकाहरुको सम्झनामा विभिन्न कार्यक्रम आयोजना भइरहेको बखतमा सो घटना भएको थियो ।