लिभरपुलमा अस्पतालबाहिर ट्याक्सी विष्फोट हुँदा एकको मृत्यु

लण्डन । लिभरपुलमा अस्पतालको परिसरबाहिर ट्याक्सी विष्फोट हुँदा एक जनाको मृत्यु भएको छ ।

लिभरपुल वुमन्स अस्पताल बाहिर आइतबार बिहान करिब ११ बजे ट्याक्सी विस्फोट भएको थियो ।

मृतक सो ट्याक्सीको यात्रु रहेको बताइएको छ तर आइतबार साँझसम्म उनको नाम खुलाइएको छैन । सोही ट्याक्सीका चालक घाइते भएका छन् उनको अस्पतालमा उपचार भइरहेको र उनको अवस्था खतरामुक्त भएको बताइएको छ ।

प्रतिआतङ्कवाद प्रहरीले सो घटनामा संलग्न भएको आशंकामा तीन जनालाई लिभरपुलबाट नियन्त्रणमा लिएको छ । यसरी पक्राउ पर्नेहरुमा २९, २६ र २१ वर्षका पुरुषहरु रहेको बताइएको छ ।

प्रहरीले सो घटना आतङ्कवादसित जोडिएको हो कि होइन भन्ने आइतबार साँझसम्म निर्क्यौल गरिसकेको छैन।

विष्फोट निक्कै ठूलो सुनिएको स्थानीयबासीले बताएका छन् ।

बेलायती प्रधानमन्त्री बोरिस जोन्सन, गृह मन्त्री प्रीति पटेल, लिभरपुलका मेयर जोआन एण्डरसन लगायतले सो घटनाको निन्दा गरेका छन् भने प्रहरीले स्थानीयबासीलाई सतर्क रहन अपील गरेको छ ।