इङल्याण्डको स्वास्थ्य सेवामा काम गर्नेहरुले कोरोना खोप लगाउनै पर्ने

लण्डन । इङल्याण्डको स्वास्थ्य सेवा (एनएचएस) मा काम गर्ने अग्रपंक्तिका कर्मचारीहरुले अनिवार्यरुपमा कोरोना खोप लगाउनै पर्ने भएको छ ।

बेलायतका स्वास्थ्य मन्त्री साजिद जाविदले आज यहाँको संसदमा बोल्दै स्वास्थ्य सेवाका कर्मचारीहरुले आगामी अप्रिल १ तारिखभित्रमा कोरोना खोप लगाउनुपर्ने बताएका छन् ।

इङल्याण्डको स्वास्थ्य सेवामा रहेका करिब १ लाख कर्मचारीहरुले कोरोना खोप लगाएका छेनन् । तर स्वास्थ्यका कारण कोरोना खोप लगाउन नमिल्ने कर्मचारीहरुलाई भने यो व्यवस्था लागू हुने छैन । यस्तै बिरामीसित प्रत्यक्ष सम्पर्क गर्न नपर्ने जिम्मेवारीमा रहेका स्वास्थ्य सेवाका कर्मचारीहरुलाई पनि यो निर्णय लागू हुने छैन ।

मन्त्री जाविदले बिरामीहरु, एनएचएसका कर्मचारीहरु र एनएचएस स्वयंलाई सुरक्षित राख्न र बच्न सकिने खतराबाट जोगाउन पनि यो व्यवस्था गर्न परेको प्रष्टिकरण दिएका छन् ।

यसैगरी, यही बिहीबारदेखि इङल्याण्डको केयर क्षेत्रमा काम गर्नेहरुले अनिवार्यरुपमा कोरोना खोप लगाउनु पर्ने छ । यदि स्वास्थ्यका कारण उनीहरुले खोप लगाउन नमिल्ने भए उनीहरुलाई यो प्रावधान लागू हुने छैन । तर बाँकीको हकमा भने कि खोप लगाउने कि जागिर छोड्ने विकल्प मात्र रहने छ ।

सरकारको सो निर्णयपछि कोभिड खोप नलगाएका केयर होमका कर्मचारीहरुको संख्या ८८ हजारबाट ३२ हजारमा झरेको छ ।