बेलायतमा कोभिडका विरुद्ध खाने औषधिले पायो अनुमति

लण्डन । बेलायतको औषधि सम्बन्धी नियामक निकायले कोभिडका विरुद्ध खाने औषधिलाई अनुमति दिएको छ ।

मोल्नुपियाभिर नाम गरेको सो चक्की औषधि कोभिडका बिरामीहरुलाई दिनको दुई पटक दिइनु पर्दछ । फ्लुको उपचारका लागि विकास गरिएको सो औषधिले परीक्षणका क्रममा आधाजसो कोभिडका बिरामीहरुलाई अस्पताल भर्ना हुनबाट बचाएको पाइएको छ ।

बेलायतका स्वास्थ्य मन्त्री साजिद जाभिदले सो चक्की कमजोर रोगप्रतिरोधात्मक क्षमता भएकाहरुका लागि प्रभावकारी हुने आशा व्यक्त गरेका छन् ।

यो औषधि कोभिडका विरुद्ध खाने गरी विकसित गरिएको पहिलो औषधि हो । अमेरिकी औषधि निर्माता कम्पनीहरुले सोको उत्पादन गरेका हुन् ।

बेलायतको नियामक निकाय मेडिसिन एण्ड हेल्थ केयर प्रोडक्ट रेगुलेटरी एजेन्सी (एमएचआरए) ले सो औषधि मध्यम किसिमको कोभिड भएका र कम्तीमा गम्भीर बिरामी हुने एउटा जोखिम रहेकाहरुलाई सिफारिस गरेको छ । मोटोपन भएका, वृद्ध, मधुमेहका बिरामी र मुटुका रोगीलाई सिफारिस गरेको छ ।

बेलायतले किनेको सो औषधिको ४ लाख ८० हजार चक्की  यसै वर्षको अन्त्य सम्ममा उपलब्ध हुने बताइएको छ । यस्तै फाइजरले परीक्षण गर्दै गरेको मुखबाट खाने चक्कीको पनि २ लाख ५० हजार चक्की बेलायतले अर्डर गरेको छ ।