शुक्रबार, माघ ७ २०७८ | Fri, January 21, 2022
नेपालको समय: ०१:४८ | UK Time: 20:03

नेपाली मूलकी सुमन पुनले बेलायतमा पाइन् काउन्सिलरको टिकट

वीनेपाली
२०७८ कार्तिक ९ गते ११:४०

लण्डन । आउँदो मे महिनामा बेलायतमा हुने स्थानीय निर्वाचनमा नेपाली मूलका एक महिलाले काउन्सिलरका लागि टिकट हात पारेकी छिन् ।
अल्डरसटमा बसोबासरत श्रीमती सुमन पुनले कञ्जरभेटिभ पार्टीबाट रसमुर बरो काउन्सिलको चेरीउड वडाबाट काउन्सिलरको टिकट पाएकी हुन् ।
लिडरसीप म्यानेजमेण्टमा एमएस्सी गरेकी सुमन सामाजिक कार्यकर्ताका साथै व्यापारमा पनि संलग्न छिन् । उनी मान ट्राभल एण्ड टूर सर्भिसको प्रबन्ध निर्देशक रहेकी छिन् भने विगत सात वर्षदेखि गोरखा सर्भिसेज लाइफ केयर म्यानेजमेण्टको पनि संस्थापक निर्देशक रहेकी छिन् ।
पूर्व गोरखा सैनिककी श्रीमती पुन सन् २०१९ देखि कञ्जरभेटिभ पार्टीमा सक्रियरुपमा आवद्ध भएकी हुन् । उनी सो पार्टीको डाइभरसिटी समूहको उपाध्यक्ष र व्यापार उद्यम समूहकी अध्यक्ष रहेकी छिन् ।
पुन स्थानीय नेपाली समुदायमा सक्रिय र परिचित छिन् । उनकै निर्माणमा केही महिनाअघि युकेका नेपाली कलाकारहरुले देशप्रेमले भरिएको म्यूजिक भिडियो पनि बनाएका थिए ।
रसमुर काउन्सिलमा कञ्जरभेटिभ पार्टीको बहुमत रहँदै आएको छ र सो काउन्सिलमा यसवर्ष पनि कञ्जरभेटिभ पार्टीबाट दुईजना नेपाली मूलका काउन्सिलर चुनिएका छन् ।
बेलायतमा नेपाली मूलका काउन्सिलरहरु थपिँदै गए पनि महिला काउन्सिलरहरुको संख्या भने न्यून छन् । यसअघि स्वान्ली काउन्सिलमा गुल्मीकी लक्ष्मी गैरे काउन्सिलर निर्वाचित भएकी थिइन् भने केही वर्षअघि गिल्फोर्ड काउन्सिलमा लेबोर पार्टीबाट काउन्सिलरको टिकट पाएकी युवा उम्मेदवार आकांक्षा गुरुङले भने विजय हासिल गर्न सकिनन् ।

 

प्रतिक्रिया

सम्बन्धित सामाग्री

फेसबुक