फोक्स्टोनमा खुल्यो नेपाली कम्युनिटी सेन्टर

लण्डन । बेलायतको फोक्स्टोन शहरमा नेपाली सामुदायिक केन्द्रको स्थापना गरिएको छ ।

स्थानीय फोक्स्स्टोन नेपाली कम्युनिटीको पहल र विभिन्न दातृ निकायहरुको सहयोगमा स्थानीय चेरिटन पुस्तकालयको भवनमा सो केन्द्रको स्थापना भएको हो ।

कम्युनिटीका ट्रष्टी एवम् कम्युनिटी सेन्टर स्थापना परियोजनाका लिड क्याप्टेन रामबहादुर पुनले केन्ट काउण्टीसित पाँच वर्षको लागि सो सेन्टर रहेको भवन लिजमा लिइएको बताए । भवनको माथिल्लो तल्लामा पुस्तकालय छ भने तल्लो तलामा नेपाली कम्युनिटी सेन्टर रहेको छ ।

सो सेन्टरमा कम्युनिटीको कार्यालय, बैठक कक्ष, कार्यक्रम गर्ने हल, दुई शौचालय, चमेना गृह रहेको छ । सो केन्द्रमा फर्निचरहरु तथा आठ वटा कम्प्युटर पनि भरिएका छन् । गोर्खा मेमोरियल फण्डको सहयोगमा ती फर्निचर र कम्प्युटरहरु जोडिएको पुनले जानकारी दिए ।

सो केन्द्रमा बृद्धवृद्धाहरुलाई भेटघाट गर्ने थलोका साथै उनीहरुलाई प्रविधि चलाउन सिकाइने उनले बताए । यसअघि गोरखा पिस फाउण्डेसनको पहलमा हुँदै आएको वयोवृद्ध गोरखा सैनिकहरुको विहीबारे भेला पनि यहीँ हुने छ ।

केन्द्र स्थापना गर्नमा स्थानीय फोक्स्स्टोन र हाइथ डिस्ट्रिक्ट काउन्सिल, केन्ट कम्युनिटी फन्ड, गोरखा पिस फाउण्डेसन, केन्ट काेस्ट भोलुण्टियर ग्रुप, द न्याशनल लोटरीलगायतले सहयोग गरेका छन् । केन्द्रमा दुई वर्षका लागि एक जना पूर्णकालिन कर्मचारीको पनि व्यवस्था गरिएको छ ।

फोक्स्स्टोनमा लामो समयदेखि गोरखाहरुको ब्यारेक रहेको छ भने नेपाली कम्युनिटीको स्थापना सन् २००५ मा भए पनि आफ्नै कार्यालय स्थापना भएको थिएन । जसका कारण कार्यसमितिको बैठक र अरु कार्यक्रम गर्न हल भाडामा लिनु पर्दथ्यो । अब भने यी समस्या हटेको पुनले बताए । ‘कम्युनिटी सेन्टरले हामी गोरखाहरुलाई मात्र होइन अरु स्थानीय कम्युनिटीसित पनि काम गर्ने मौका मिल्नेछ’ उनले भने ।

लिजवापत कम्युनिटीले मासिक १०० पाउण्ड केन्ट काउण्टीलाई बुझाउनु पर्छ भने पाँच वर्षपछि सो लिज नविकरण पनि गर्न मिल्नेछ । यसबाहेक कम्युनिटी केन्द्र सन्चालनका लागि वार्षिक करिब १० हजार पाउण्ड खर्च लाग्ने अनुमान गरिएको छ । सो खर्च धान्नका लागि कम्युनिटीको सदस्यता शुल्क, हल भाडा र अरु आय आर्जनका कार्यक्रम गरिने योजना बनाइएको छ ।

सो केन्द्र पाउनका लागि कम्युनिटीले करिब डेढ वर्ष लामो प्रक्रिया पूरा गर्नु परेको थियो । सरकारी भवनको भाग भएका कारण पनि प्रशासनिक कार्यमा लामो लमय लागेको पुन बताउँछन् । कम्युनिटी र काउण्टीबीच जुलाई १ मा सम्झौता भए पनि रिफर्बिसमेण्टमा दुई महिना लागेको थियो ।

गत बिहीबार आयोजित एक कार्यक्रमबीच सो सेन्टरको उद्घाटन गरिएको छ । परियोजनाका प्रमुख पुन सो केन्द्र स्थापनाका लागि सहयोग गर्ने दाताहरु, स्वयंसेवकहरु, शुभेच्छुकहरु, कम्युनिटीका सदस्यहरु सबैमा धन्यवाद दिन्छन् ।