बेलायतमा इन्धन संकट हटाउन सोमबारदेखि सैनिकले इन्धन ढुवानी गर्ने

लण्डन । बेलायतमा देखिएको इन्धन आपूर्तिको अल्पकालित समाधानका लागि सेनालाई परिचालन गरिएको छ ।

पेट्रोलियम पदार्थको मौज्दात प्रशस्त भए पनि स्थानीय पेट्रोल स्टेशनसम्म ढुवानी गर्न पेट्रोलियम ट्याङ्कर चालकहरु पर्याप्त नभएपछि बेलायतमा गतसाताबाट इन्धनको समस्या देखिएको छ । सो समस्यालाई अल्पकालिन समाधानका लागि सरकारले सैनिकहरुलाई इन्धन ढुवानीका लागि तालिम दिई सोमबारबाट आपूर्तिका लागि खटाउने भएको छ ।

बीबीसीका अनुसार सोमबार करिब १०० सैनिक चालकहरुले इन्धन आपूर्ति गर्नेछन् ।

सरकारले करिब २०० सैनिकहरुलाई इन्धन ढुवानीका लागि तालिम दिइसकेको छ । ‘अपरेसन इस्कालिन’ नाम दिइएको यस योजनामा उनीहरुलाई इन्धन ओसारपसार, भण्डारण, आदिको तालिम दिइएको छ ।

सरकारले चालकको अभाव पूर्ति गर्न विदेशबाट कामदार ल्याउनका लागि भिसा खुकुलो बनाउने निर्णय लिएको छ । जसअनुसार करिब ३०० चालकहरुलाई तुरुन्त ल्याउने र मार्च २०२२ सम्म भिसा दिइने छ । थप ४ हजार ७०० चालकलाई फेब्रुअरी २०२२ सम्मको भिसा दिइनेछ ।

उता, ब्रिटिश पेट्रोलियम (बिपी) ले पेट्रोलियम पदार्थको आपूर्ति व्यवस्था सुधार हुँदै गएको र आउने दुई साताभित्र सामान्य हुने अपेक्षा गरेको छ ।

पेट्रोलियम रिटेलर्स एसोसिएनले बेलायतका अधिका‌ंश भागमा पेट्रोलियम पदार्थको आपूर्ति सुधार हुँदै गएको र लण्डन तर दक्षिण पूर्वी क्षेत्रमा मात्र सुधार हुन बाँकी रहेको जनाएको छ ।