गोरखा समस्या बारेमा डिसेम्बरमा हुने वार्ताको तयारी गर्न बेलायती रक्षा मन्त्री पुगे नेपाली दुताबास

लण्डन । गोरखा भूतपूर्व सैनिकहरुको मागका बारेमा आगामी डिसेम्बर महिनामा हुने वार्ताका बारेमा छलफल गर्न नेपाल-बेलायत तथा गोरखा भूतपूर्व सैनिकका प्रतिनिधिहरुबीच आज बैठक बसेको छ ।

नेपाली दुताबास लण्डनमा बसेको सो बैठकमा बेलायतका रक्षा मन्त्री बेन वालेस र रक्षा राज्य मन्त्री लियो डोचेर्टी, बेलायतका लागि नेपाली राजदुत लोकदर्शन रेग्मी र भूपू ब्रिटिस गोर्खा संगठनहरू गोरखा संयुक्त सत्याग्रह संघर्ष समितिबाट प्रमुख संयोजक कृष्णबहादुर राई र जुद्धबहादुर गुरुङ, गोरखा भूतपूर्व सैनिक स‌ंघ (गेसो) का सभापति कृष्णकुमार राई, ब्रिटिश गोरखा वेलफेयर सोसाइटीका अध्यक्ष मेजर रिटायर्ड टिकेन्द्र दल देवान, नेपाल भूतपूर्व सैनिक स‌ंघ (नेसा) का सभापति केशबहादुर गुरुङ, गोरखा पेन्सन इनजस्टिस ग्रुपका अध्यक्ष उदयबहादुर गुरुङ, युबीजीएनका अध्यक्ष राम राई सहभागी थिए ।

यस्तै दुताबासका उपनियोग प्रमुख रोशन खनाल, आमरण अनसन बसेका गोरखाहरु ज्ञानराज राई, धनबहादुर गुरुङ र पुष्पा राणा घले, सैनिक सहचारी कर्णेल रत्नबहादुर गोदार पनि सो बैठकमा उपस्थित थिए ।

बैठकमा भूतपूर्व गोर्खाहरुको माग सम्बोधनका लागि विगतमा भएको सहमति अनुरूप भूपू गोर्खाका प्रतिनिधिहरू सम्मिलित नेपाल सरकार र संयुक्त अधिराज्य सरकारबीच डिसेम्बर महिनादेखि शुरू हुने वार्ताको लागि वार्ता समिति गठन, वार्ता समितिको कार्यविवरण एवं अन्य आवश्यक तयारीका विषयमा छलफल भएको दुताबासले बैठकपछि जारी विज्ञप्तिमा जनाएको छ।