लण्डन । गोरखाहरुको समस्याबारे नेपाल तथा बेलायत सरकारबीच तत्काल वार्ताको माग राख्दै आमरण अनसनमा बसिरहेका धनबहादुर गुरुङ अचानक स्वास्थ्य समस्याका कारण स्थानीय अस्पतालमा उपचार गराई अनसनमा फर्केका छन् ।
बुधबार बिहान फेसबुकमा स्टाटस लेख्दै गुरुङले सोमबार बेलुकी उच्च रक्तचाप तथा मुटुको धडकन धीमा भइ पछि सेन्ट थोमस अस्पतालमा भर्ना भएको र उपचारपश्चात बिहान १ बजेर १० मिनेटमा अनसनमै फर्केको बताएका छन् । उनले अहिले आफ्नो स्वास्थ्य अवस्था सामान्य रहेको बताएका छन् ।
पूर्व गोरखा सैनिक गुरुङ १२ दिनदेखि बेलायती प्रधानमन्त्रीको कार्यालय टेन डाउनिङ स्ट्रिट अघि आमरण अनसन बसिरहेका छन् । उनीसँगै ज्ञानराज राई र पुष्पा राणा घले पनि आमरण अनसनमा छन् ।
सोमबार बेलुका गुरुङको स्वास्थ्य बिग्रिएपछि अनसनस्थलमै एम्बुलेन्स बोलाइ उपचार गरिएको थियो । उनलाई ह्वीलचेयरमा राखेर एम्बुलेन्स चढाउँदै गरेको तस्वीर सार्वजनिक भएपछि उनी तथा अनसनरत गोरखाहरुको स्वास्थ्यका बारेमा चिन्ता बढेको थियो ।
