गोरखाहरुलाई समान पेन्सनका लागि शुरु गरिएको अभियानमा एक सातामै ५३ हजारले गरे हस्ताक्षर

हस्ताक्षर संकलनका लागि तयार गरिएको पेजमा गोरखाहरुलाई उस्तै सेवा र तहमा सेवा गरेका बेलायती समकक्षीसरह पेन्सन दिलाउन बेलायत सरकारसित माग गरिएको छ । धेरै गोरखाहरुले बेलायती सेनामा काम गरेपछि पाइने पेन्सनले आफ्नो परिवारलाई पाल्न पुग्छ भन्ने विश्वास गरे पनि दुर्भाग्यवश त्यसो हुन नसकेको बताइएको छ ।

गोरखा भूतपूर्व सैनिकहरुको एक संस्थाको आयोजनामा बेलायतको प्रधानमन्त्री कार्यालय अगाडी आमरण अनसन बसिरहेको बेला संसदबाट पनि दबाब दिने उद्देश्यले सो हस्ताक्षर अभियान शुरु गरिएको हो ।

बेलायतमा कुनै पनि विषयमा १ लाखभन्दा बढी हस्ताक्षर संकलन भएमा त्यस्तो विषयमा संसदमा छलफल हुने प्रावधान रहेको छ ।

प्रख्यात पर्वतारोही निर्मल पुर्जा एमबीई लगायत धेरै नेपाली नागरिक अभियानका अगुवाहरुले सो हस्ताक्षर अभियानमा भाग लिन अपील गरेका छन् ।

तपाई पनि सो हस्ताक्षर अभियानमा भाग लिन चाहनुहुन्छ भने यहाँ जानुहोला ।