एनआरएनए अध्यक्षका तीन उम्मेदवारहरु
लण्डन । एनआरएनए युकेका अध्यक्षका उम्मेदवारहरुले हस्ताक्षर गर्न नमानेको कारण निर्वाचनको मतपरिणाम घोषणा हुन ढिलाई भएको निर्वाचन समितिले प्रष्ट गरेको छ ।
प्रमुख निर्वाचन आयुक्त महेन्द्रराज कँडेलले शुक्रबार बिहान एक स्टाटस लेख्दै मतपरिणाम सार्वजनिक गर्न अघि अध्यक्षका प्रत्याशीहरुको हस्ताक्षर आवश्यक भएको र अध्यक्षका तीन प्रत्याशीहरुमध्ये दुई जनाले हस्ताक्षर नगरेका कारण विहीबार मतपरिणाम घोषणा गर्न नसकिएको बताएका छन् ।
अध्यक्षका प्रत्याशीहरुलाई विहीबार निर्वाचन समितिको कार्यालयमा बोलाई साँझ ८ बजेसम्म छलफल र बहस चलाए पनि हस्ताक्षर हुन नसकेको उनले स्टाटसमा बताएका छन् । ”हिजो हामीले अध्यक्ष पदका तीन जना प्रत्यासी उम्मेदवारहरुलाई निर्वाचन समिति कार्यालयमा बोलाई बेलुकी ८ बजेसम्म लामो छलफल र बहस चलाएको समेत जानकारी गराइन्छ। तर वहाँहरू हस्ताक्षर गर्न सहमत हुनुभएन । अन्तत यसकारण मतपरिणाम सार्वजनिक गर्ने प्रक्रिया अगाडी बढ्न नसकेको जानकारी गराउँछौँ” उनले भनेका छन् ।
उनका अनुसार उम्मेदवारहरुले एनआरएनए युकेको निर्वाचन गराउने कम्पनी च्वाईस भोटिङको अनुरोधअनुसार मतपरिणाम सार्वजनिक गर्दा अनलाइन चुनावी प्रक्रिया र त्यसको नतिजा हामीलाई स्वीकार्य छ भनि सहमतिपत्रमा हस्ताक्षर गर्नुपर्ने हुन्छ । उक्त सहमति पत्रमा हालसम्म एकजनाको मात्रै हस्ताक्षर प्राप्त भएको छ ।
सो पत्रमा अध्यक्षका प्रत्याशी दीपक श्रेष्ठले मात्र हस्ताक्षर गरेको र बाँकी दुई जनाले नगरेको बुझिएको छ ।
निर्वाचन समितिले अनलाइन भोटिङ सकिएपछि मतपरिणाम सार्वजनिक गर्नुपूर्व सम्बन्धित मुख्य व्यक्तिहरुलाई यो सहमति माग्नु बेलायती चुनावी प्रणालीमा स्वाभाविक मानिने र यस्तो सहमतिमा हस्ताक्षर प्राप्त नभएका कारण चुनावको नतिजा नै रोकिएको जनाएको छ ।
समितिले एनआरएनएका अभियन्ताहरुसँग यो असहज परिस्थितिबाट निकासा दिलाउन प्रत्यासी उम्मेदवारहरुबीच सहमति जुटाउन लागि सहयोग गरिदिन अनुरोध गरेको छ ।
समितिले मतपरिणाम समयमा नै घोषणा नहुनुमा निर्वाचन समिति र च्वोइस भोटिङको कुनै पनि भूमिका नरहेको प्रष्ट्याएको छ ।
