मंगलबार, असोज ५ २०७८ | Tue, September 21, 2021
नेपालको समय: ०८:३७ | UK Time: 03:52

शिशुघातको अभियोगमा दोषी बबिता राईलाई ‘कम्युनिटी अर्डर’ को सजायँ

अदालतद्वारा उनलाई थुनामुक्त गर्न आदेश

वीनेपाली
२०७८ साउन १२ गते २२:४४

विन्चेष्टर क्राउन कोर्ट

लण्डन । अल्डरसटमा शिशु घात गरेको अभियोगमा दोषी ठहर भएकी २४ वर्षीया बबिता राईलाई दुई वर्ष ‘कम्युनिटी अर्डर’ को सजायँ भएको छ।

न्यायाधीश जोन्सनले सोमबार विन्चेष्टर क्राउन कोर्टमा सो फैसला सुनाएका हुन् । यसअघि उनलाई जुरीले शिशुघात गरेकोमा दोषी ठहर गरेको थियो तर हत्याको अभियोगमा भने सफाइ दिएको थियो ।

उनलाई सन् २०१७ मा नवजात शिशुलाई हत्या र घात गरेको अभियोग लगाइएको थियो । न्यायाधीश जोन्सनले उनलाई सो सजायँको साथमा ३० दिन पुनर्स्थापनाको कोर्स गर्न पनि आदेश दिएका छन् ।

सजायँ फैसला हुनुअघि नै ३८५ दिन थुनामा बिताइसकेकोले उनलाई थुनाबाट मुक्त गर्न सकिने न्यायाधीश जोन्सनले बताएका छन् ।

शिशुघातको अभियोगमा जन्मकैदसम्मको फैसला हुनसक्ने भए पनि राईलाई कम सजायँ तोकिएको बताइएको छ । फैसला सुनाउने क्रममा न्यायाधीश जोन्सनले नेपालको पितृ सत्तात्मक समाजमा परिवारको इज्जतमा धब्बा लाग्ने किसिमको गर्भ बोक्नु राईलाई कति गाह्रो थियो भन्ने उल्लेख गरे ।

विगत ४२ वर्षमा बेलायतमा शिशु घात गरेको अभियोगमा एक जनालाई मात्र जेल पठाइएको थियो तर सो फैसलालाई पुनरावेदनबाट उल्टाइएको थियो ।

न्यायाधीश जोन्सनले यस्ता किसिमका मुद्दामा सजायँ र दण्डभन्दा पनि सहानुभूति, सहयोग र पुनर्स्थापना आवश्यक छ भनेर कानुनले पहिचान गरेको बताए ।

बेलायतमा कतिपय अपराधमा दोषी ठहर भएको व्यक्तिलाई जेल नपठाई कम्युनिटी अर्डर दिन सकिने व्यवस्था छ । कम्युनिटी अर्डर बढीमा तीन वर्षसम्म दिन पाइन्छ र सो अवधिमा त्यस्तो सजायँ पाएको व्यक्तिले निगरानीमा रही बिना पारिश्रमिक सामुदायिक काम गर्नुपर्ने हुन्छ ।

राई सन् २०१७ मा बेलायत आएकी थिइन् । सो समयमा उनी गर्भवती रहेको पुष्टी भएको छ तर उनले जीपीमा दर्ता हुने फाराममा गर्भवती रहे नरहेको बारे सोधिएको प्रश्नमा भने ‘नट एप्लिकेवल’ लेखेकी थिइन् ।

मे १५, २०१७ को राति उनले अल्डरसटको मानोर पार्कमा दुई रुखको बीचमा छोरीलाई जन्म दिएकी थिइन् ।

मे १९ का दिन पार्कका कर्मचारीले मृत शिशु फेला पारेका थिए । त्यसपछि प्रहरीले सो केसलाई अगाडी बढाएको थियो । प्रहरीले सो केसलाई ‘बेबी एम’ नाम दिएको थियो । सो घटनाको करिब तीन वर्षपछि सन् २०२० मार्च ९ मा प्रहरीले राईलाई पक्राउ गरेकाे थियो र जुलाई ७ मा हत्याको अभियोग लगाएको थियो ।

सो घटनाको अनुसन्धानका क्रममा प्रहरीले १ हजार २०० घरमा पुगेको, ५ हजार प्रश्नावली भराएको र १ हजार घण्टाको सिसीटिभी फुटेज हेरेको बताएको छ ।

यसै वर्षको मे ५ मा विन्चेष्टर क्राउन कोर्टमा भएको सुनुवाईमा सरकारी वकिलले नवजात शिशु जन्मेर ६ घण्टा बाँचेको बताएका थिए । सरकारी वकिलले बच्चा जन्मेपछि राईले शिशुको टाउकोमा चोट पुर्याएको र सोही चोटका कारण बच्चाको मृत्यु भएको पनि जिकिर गरेका थिए ।

राईमाथि हत्या र शिशुघातको अभियोग लगाइए पनि उनले इन्कार गरेकी थिइन् । मे २० का दिन जुरीले उनीमाथिको हत्याको अभियोग अस्वीकार गरेको थियो भने उनलाई शिशु घातमा दोषी ठहर गरेको थियो ।

प्रतिक्रिया

सम्बन्धित सामाग्री

फेसबुक