लण्डन । मेडवे काउन्सिलका काउन्सिलर पूर्व गोरखा सैनिक टासी भुटियाको निधन भएको छ ।
तीन पटकसम्म काउन्सिलरमा निर्वाचित भुटियाको मंगलबार निधन भएको उनका सहकर्मी काउन्सिलर ग्लोरिया ओपराले जानकारी दिएको केन्ट अनलाइनले जनाएको छ ।
सन् २००९ देखि बेलायतको स्थानीय राजनीतिमा प्रवेश गरेका भुटिया १२ वर्षसम्म कन्जरभेटिभ पार्टीबाट काउन्सिलर रहेका थिए । पछिल्लोपटक सन् २०१९ मा उनी प्रिन्सेस पार्क वार्डबाट निर्वाचित भएका थिए ।
गोरखा ब्रिगेडमा सेवा गरेका भुटिया सन् १९८० देखि चाथाम मेडवेमा बसोबासरत थिए । उनी काउन्सिलरका साथसाथै बीएई सिस्टममा कार्यरत थिए । स्थानिय चाथाम च्यारिटीका ट्रष्टी भुटिया गोरखा नेपाली कम्युनिटीको सल्लाहकार रहेका थिए ।
उनका श्रीमती, तीन सन्तान र दुई नातिनातिना रहेका छन् ।
