प्रिन्स फिलिपलाई गोरखाहरुको विदाइ सम्मान (तस्वीरसहित)

लण्डन । बेलायतका प्रिन्स फिलिपको अन्त्येष्ठीको दिन पारेर गोरखाहरुले पनि उनलाई विदाई सम्मान दिएका छन् ।

यसक्रममा ननिटनस्थित ब्रिटिश गोरखा भेट्रान एसोसिएसन युकेले पनि स्थानीय पार्कमा रहेको स्मारकमा जम्मा भई अन्तिम विदाई सम्मान व्यक्त गरेको छ । प्रिन्स फिलिपको अन्त्येष्ठीको समय अपराह्न ३ बजे नै आयोजित सो कार्यक्रममा ब्रिटिश गोरखा भेट्रान्स एसोसिएसन, मलाया बोर्नियो फार इष्ट भेट्रान्स, रोयल सिग्नल्सले आफ्नो झण्डासहित सम्मान व्यक्त गरेका थिए ।

गोरखा भेट्रान्सका अध्यक्ष ओम गुरुङले प्रिन्स फिलिपको फोटोमा रिथ चढाएका थिए भने एसोसिएसनका सदस्यहरु सैन्य पोशाकमा पदकहरुसहित सहभागी भएका थिए ।

खुला पार्कमा भएको सो कार्यक्रमलाई करिब दुई सयको संख्यामा उपस्थित स्थानीय बासिन्दाहरुले पनि सामाजिक दुरी कायम गरी अवलोकन गरेका थिए ।

सो अवसरमा विगुलबाट अन्तिम सलामी दिनुका साथै प्रिन्स फिलिप प्रति १ मिनेट मौनधारण पनि गरिएको थियो ।