जीत रानाभाट ग्रीनवीचको ‘मेक ए डिफरेन्स हिरो’

लण्डन । ग्रीनवीच काउन्सिलले कोरोना महामारीका बेला समुदायलाई सेवा पुर्याउनेहरुमध्येबाट रोयल ग्रीनवीच नेपलिज सोसाइटीका अध्यक्ष जीत रानाभाटलाई ‘मेक ए डिफरेन्स हिरो’ को सम्मान दिएको छ ।

लण्डनका हरेक काउन्सिलबाट लकडाउनका बेला पुर्याएको सामाजिक योगदानका आधारमा सो सम्मान दिइएको हो ।

यसरी छनौटमा परेका मेक ए डिफरेन्स हिरोहरुलाई बीबीसी रेडियो लण्डनले अन्तर्वार्ता लिने गरेको र रानाभाटसित पनि अन्तर्वार्ता गरिसकेको छ ।

स्थानीय काउन्सिलको नोमिनेसन तथा बीबीसी जस्तो प्रतिष्ठित मिडियामा अन्तर्वार्ता गर्न पाउँदा कस्तो लाग्यो भन्ने प्रश्नमा रानाभाटले भने, ‘कहीँबाट सम्मान पाइएला भनेर काम गरेकाे थिइनँ तर समुदायमा गरेको कामको अभिलेख कसैले राखिराखेको हुँदोरैछ । गरेको कामको कदर हुनेरैछ ।’

अन्तर्वार्ताका क्रममा के के सोधियो भन्ने जिज्ञासामा उनले भने, ‘लकडाउनका अवधिमा के के सामाजिक कार्य गर्नुभयो, स्थानीय निकायले किन नोमिनेसन गर्यो लगायतका प्रश्न सोधियो ।’

रानाभाट एनआरएनए युकेका सचिव पनि हुन् । महामारीका बेला एनआरएनएले गठन गरेको हेल्पलाइनका उनी एक संयोजक रहेका थिए भने रोयल ग्रीनवीच नेपाली सोसाइटीबाट पनि राहत, खाद्यान्न, ओखती वितरण, खोप वितरण लगायतमा सक्रिय छन् ।