लण्डन । कोरोना भाइरसको प्रभावलाई नियन्त्रण गर्न बेलायत सरकारले चित्तबुझ्दो कारण बिना विदेश यात्रा गरेको खण्डमा ५ हजार पाउण्ड जरिवाना गर्ने प्रस्ताव गरेको छ ।
सरकारले तयार गरेको सो प्रस्तावमाथि यही विहीबार संसदमा मतदान हुने र अर्को सातादेखि कार्यान्वयनमा आउने छ ।
सरकारले घरमै बस्नु भनेर दिएको निर्देशन यही सोमबार सकिन लागेको अवस्थामा विदेश यात्रालाई निरुत्साहन गर्न नयाँ नियम ल्याउन लागिएको हो ।
बेलायतबाट अध्ययन, काम र उपचारबाहेक विदा मनाउन विदेश जान अहिले निषेध गरिएको छ भने अन्य मुलुकहरुबाट पनि पर्यटकहरुलाई बेलायत आउन बन्द गरिएको छ । बेलायती नागरिक वा बेलायतमा बसोबासरत व्यक्तिहरुका लागि पनि बेलायत प्रवेशमा कडा प्रावधानहरु राखिएका छन् ।
बेलायतमा समर आउँदै गरेको र सरकारले लकडाउन खुलाउन शुरु गर्दै गरेको अवस्थामा नागरिकहरुलाई विदेश यात्रामा कडाइ गरिएको छ । सरकारको पूर्व घोषित तालिकाअनुसार भयो भने १७ मेमा पहिलो पटक इङल्याण्डका बासिन्दाले विदेश यात्रामा जान पाउने छन् । तर युरोप लगायतका मुलुकहरुमा पुन संक्रमण फैलँदै गएकाले यसै भन्ने अवस्थामा भने छैन ।
बेलायतका स्वास्थ्य मन्त्री म्याट ह्यानककले भाइरसको आयात र नयाँ नयाँ भेरियन्टका कारण खोप कार्यक्रमलाई जोखिममा पार्नसक्ने भएकाले विदेश यात्रामा कडाइ गर्न परेको बताएका छन् । सरकारको सो कार्यलाई प्रमुख प्रतिपक्षी दल लेबोरले पनि समर्थन गरेको छ ।
सरकारको यो नियम बेलायतका विभिन्न आइल्याण्डहरु र आयरल्याण्डमा यात्रा गर्नका लागि भने लागू हुने छैन ।
