राजदुत लोकदर्शन रेग्मीको स्वागत तथा सम्मान

लण्डन । प्रवासी नेपाली एकता मंच युकेले बेलायतका लागि नेपाली राजदुत लोकदर्शन रेग्मीलाई स्वागत र सम्मान गरेको छ । गत साता राजदुत रेग्मीले जिम्मेवारी सम्हालेपछि र दुतावासका नयाँ डिसिएस रोशन खनालले कार्यभार सम्हालेपछि उक्त सम्मान गरिएको हो ।
भक्त गुरुङको अध्यक्षमा बुधबार भर्चुअल रुपमा भएको कार्यक्रममा बेलायतस्थित नेपालीको समस्या समाधान गर्न दुतावास रहने अपेक्षा कार्यक्रममा सहभागी मंच युकेका नेताहरुले गरेका थिए । सम्मान ग्रहण गर्दै राजदुत रेग्मीले आफु भूतपूर्व गोर्खाहरुका समस्याबारे अवगत रहेको र वार्ताद्वारा उक्त समस्याको समाधान गर्न आफुले सक्दो प्रयास गर्ने बताए ।
आफ्नो सम्मानमा बुधबार सांझ आयोजित भर्चुएल समारोहलाई सम्बोधन गर्दै राजदूत रेग्मीले नेपाल र बेलायतबीचको बहुआयामिक सम्बन्धलाई थप समृद्ध बनाउन आफुले कुनै कसर बांकी नराख्ने जनाए । उनले यहाँस्थित नेपाली संघसंस्थासंग सहकार्य गरेर अगाडी बढ्ने बताए ।

‘जहाँ रहे पनि नेपाल र नेपालीको हित भन्दा माथि अन्य विषय रहने छैन। नेपाल र नेपालीको दिग्विजय हुनु पर्छ। सुख, दुख, अवसर र समस्यामा पनि संगै कार्य गरेर नै हामीले सफलता प्राप्त गर्न सक्छौं। विकास र सभ्यता, जीवन र जगतको हितका लागि हामी काम गरौँ। हाम्रो साथ, सहयोग, समर्थन र सहकार्य संधै रहने छ,’ उनले भने। गत मार्च १ तारिखका दिन लन्डन आइपुगेका राजदूत रेग्मीले सोही दिन नै आफ्नो जिम्मेवारी सम्हालेका थिए।

स्वागत कार्यक्रममा लन्डन स्थित नेपाली दूतावासकी उपनियोगप्रमुख रोशन खनालले बेलायतस्थित नेपाली समुदाय अत्यन्तै परिपक्व र विविधतायुक्त रहेको बताइन् । उनले नेपाली दूतावासबाट प्रदान गरिने सेवाहरु प्रभावकारी र छिटोछरितो बनाउन दूतावासले प्रयास गरीरहेको बताउंदै बेलायतस्थित नेपाली समुदायसंग रहंदै आएको असल सम्बन्ध कायमै रहने विश्वास गरिन ।
महासचिव सुरेशजंग शाहले संचालन गरेको कार्यक्रममा अध्यक्ष भक्त गुरुङले दुतावाससँग मिलेर काम गर्न तयार रहेको बताए । उक्त सम्मान कार्यक्रममा स्वागत अभिनन्दन पत्रको बाचन वालकन्या केनिशा गौतमले बाचलन गरेकी थिइन ।

कार्यक्रममा पुर्व अध्यक्षहरु दिनेश घिमिरे, रामशरण सिंखडा, कर्णबहादुर शाहीले स्वागत मन्तव्य राखेका थिए । कार्यक्रममा उपाध्यक्ष रमेश बास्तोलाले स्वागत मन्तव्य राखेका थिए भने कन्याकुमारी पुजा क्षेत्रीले धन्यवाद दिएकी थिइन । कार्यक्रममा उपाध्यक्ष रमेश बास्तोलाले स्वागत मन्तव्य राखेका थिए । त्यस्तै, माल्टाका समाजजसेवी तथा व्यसायी भवन अर्याल, मंचका नेताहरु अर्जुन चापागाई, नारायण कँडेल , रामकुमार गुरुङ, तारा भण्डारी, विदुर खत्री ,केदार थपलियालगायतले पनि स्वागत मन्तव्य राखेका थिए ।