लण्डन । नेपाल कम्युनिस्ट पार्टी (नेकपा)को नेपालमा विभाजन भएपछि त्यसको असर बेलायतमा पनि परेको छ । नेकपा (प्रचण्ड-माधव समुह) मुल संगठनमा र नेकपा (ओली) समुहले छुट्टै गतिविधि गर्दै आएपनि आइतबारदेखि औपचारिक बिभाजन हुन लागेको हो । नेकपा सम्बद्ध प्रवासी नेपाली एकता मंच युके आइतबार गृहमन्त्री रामबहादुर थापा प्रमुख अतिथिका रुपमा उपस्थित हुने भेलाले भक्त गुरुङको नेतृत्वमा नयाँ कार्यसमिति गठन गर्नेछ ।
नेकपाका कमिटिहरुमा अध्यक्ष र सचिव फरक फरक समुहमा लागेर संगठन पुनर्गठन हुने गरेकामा बेलायतका भने दुवै नेता नेकपा (प्रचण्ड-माधव)मा रहेपछि छुट्टै खोल्न लागिएको हो । गत महिना प्रवासी नेपाली एकता मंच युकेको कार्यसमितिको पुर्ण बैठकमा ओली पक्षका दुई जना सदस्य मात्र खड्गप्रसाद ओलीको पक्षमा उभिएका थिए । जसमा सरस्वती केसी र हेम लिम्बु थिए ।
प्रवासी नेपाली एकता मंच युकेका अध्यक्ष राजेन्द्र पुडासैनी र सचिव सुरेश गौतम नेकपा(प्रचण्ड माधव)समुहमा बसेपछि गुरुङले आफ्नो नेतृत्वमा संगठन खोल्न प्रवास समुह युके नामको संस्था खोल्दै सामाजिक संजालमा गतिविधि गर्दै आएका थिए । सोही गतिविधिलाई पार्टी संगठनको रुपमा उम्याउदै नेकपा ओली समुहले दिउँसो आफ्नो समुहको भेला गरि प्रवासी नेपाली मंच युके नामकै अर्काे संगठन खोल्न लागेको हो । जसको अध्यक्ष गुरुङ हुनेछन । गुरुङ गैरआवासीय नेपाली संघ(एनआरएनए) अन्तरराष्ट्र्रिय समन्वय परिषद(आइसीसी)मा बेलायतबाट मनोनित सदस्य हुन् । स्रोतका अनुसार सवैलाई पद दिएर प्रवासमा अहिले सम्मकै ठुलो कार्यसमिति बनाउन लागिएको छ ।
