लण्डन । ब्रिटेन नेपाल प्रज्ञा परिषदले सन् २०२१ को विद्यावारिधि शोध पुरस्कारका लागि दरखास्त आह्वान गरेको छ ।
परिषदका अनुसार विश्वका जुनसुकै देशबाट पुरस्कारका लागि आवेदन गर्न सकिने छ ।
परिषद्ले सन् २०१८ देखि सो पुरस्कारको शुरुवात गरेको हो । यसवर्ष दुई जना सम्मलाई पुरस्कृत गर्न सकिने बताइएको छ । पुरस्कारको राशी जनही २५० पाउण्ड रहेको छ ।
१५ जनवरी २०१९ भन्दा पछि विद्यावारिधीमा भर्ना भएका वा विद्यावारिधी उत्तीर्ण गरेकाहरुले सो पुरस्कारका लागि दरखास्त दिन पाउँछन् । यसभन्दा अघि पनि सो पुरस्कारका लागि आवेदन गरेका तर पुरस्कार नपाएकाहरुले नयाँ आलेखका साथ पुरस्कारका लागि आवेदन दिन पाउनेछन् तर उनीहरु पनि १५ जनवरी २०१९ पछि नै विद्यावारिधी गरेको हुनुपर्नेछ ।
पुरस्कारका लागि आवेदन दिँदा १० हजार शब्द सम्मको विद्यावारिधीको खण्ड, समीक्षाका लागि लागि पठाइएको लेख वा शोधपत्रका आधारमा प्रकाशित अनुसन्धानमूलक लेख पठाउनुपर्नेछ । शोध समाज विज्ञान वा मानविकीका साथै प्राविधिक क्षेत्र जस्तै जनस्वास्थ्य वा वनविज्ञानका क्षेत्रमा सामाजिक आयाम वा नेपाल र नेपाली सँस्कृतिका बारेमा लेखिएकाे हुनुपर्नेछ ।
इच्छुक आवेदकहरुलाई आवेदन दिन १५ मार्च सम्मको समय दिइएको छ । परिषदको पुरस्कार उपसमितिले विजेताकाे छनौट गरी १५ अप्रिलमा घोषणा गर्नेछन् । विजेतालाई अप्रिल २२ र २३ मा हुने नेपाल अध्ययन दिवसमा पुरस्कृत गरिने छ ।
पुरस्कारका लागि आवेदन गर्न इच्छुकहरुले [email protected] मा इमेल गरी आवेदन पठाउन सक्नेछन् ।
