मंगलबार, फागुन १८ २०७७ | Tue, March 02, 2021
नेपालको समय: ००:०९ | UK Time: 18:24

विश्व नेपाली साहित्य महासङ्घ यूकेले मातृभाषामा साहित्य उत्सव गर्दै

अमित थेवे
२०७७ माघ ४ गते १४:०२

लन्डन । मातृभाषालाई अन्तर्राष्ट्रियकरण गर्ने उद्देश्यले विश्व नेपाली साहित्य महासङ्घ साउथ यूकेले आगामी महिना मातृभाषा साहित्य उत्सव आयोजना गर्ने भएको छ ।
नेपाली समाजको साँस्कृतिक विविधतालाई साहित्यमार्फत् उजागर गर्न महासङ्घले सो उत्सव गर्न लागेको हो ।
विश्व मातृभाषा दिवसका अवसर पारेर संस्थाले बेलायतमा आगामी फेब्रुअरी महिनाको तेस्रो आइतबार मातृभाषा साहित्य उत्सव आयोजना गर्न लागेको विश्व नेपाली साहित्य महासङ्घ, साउथ यूकेका अध्यक्ष विजय हितानले बताए । उनले जातीय बहुविविधतालाई सम्बोधन गर्दै सिर्जनामार्फत् मातृभाषाको साहित्यलाई प्रबद्र्धन गर्न उत्सवले टेवा पु¥याउने बताए ।
महासंघको यही शनिबार बसेको तेस्रो बैठकले सो कार्यक्रमको संयोजकका रूपमा सचिव अमित थेवेलाई तोकेको अध्यक्ष हितानले जानकारी दिए । उनले उत्सवमा मदन पुरस्कार विजेता एवम् केही समयअघि गठन भएको आदिवासी जनजाति साहित्यकार महासङ्घ नेपालका संयोजक राजन मुकारुङलाई प्रमुख वक्ताका रूपमा निम्तो दिइसकिएको बताए ।
संयुक्त राष्ट्र संघको विशेषज्ञ संस्था युनेस्कोको आह्वानमा सन् २००० यता प्रत्येक वर्षको फेब्रुअरी २१ तारिखलाई विश्व मातृभाषा दिवसका रूपमा मनाउँदै आइएको छ ।
यसैगरी, बैठकले गत जनवरी ३ मा आयोजना गरेको मास्टर मित्रसेन थापा मगरबारे परिचर्चा कार्यक्रम अत्यन्तै सफल रहेको ठहर गर्दै आगामी वर्ष अझ व्यापक रूपमा आयोजना गर्ने बताएको छ । त्यसैगरी, आउने नोभेम्बर महिनामा १३ जना भिक्टोरिया क्रस पदक विजेता गोर्खाली सैनिकहरूलाई स्मरण गर्दै युद्ध साहित्य गोष्ठी समेत गर्ने सहसचिव लाहाङ चेम्जोङले जानकारी दिए । त्यस्तै, मार्च महिनाको अन्तिम शनिबार संस्थाको स्थापना दिवसका अवसरमा गीतकार गणेश पुनद्वारा लिखित ‘बाटो’ गीति सङ्ग्रहको समेत विमोचन गर्ने बैठकले निर्णय गरेको छ ।
बैठकसँगै नियमित साहित्यिक श्रङ्खलाअन्तर्गत कृति उपर समीक्षा गर्ने कार्यक्रम पनि सम्पन्न भएको अध्यक्ष हितानले बताए । उनका अनुसार गीतकार सेमन्त राईको गीत ‘उभौली’ माथि गणेश पुनले चर्चा गरे भने गीतकार सुष्मा रुपाबुङ राईको गीत ‘एउटा यस्तो प्रेम कहानी’ माथि औतारी साइलाले बोले । त्यस्तै, विश्वजीत थापाले निर्देशन गरेको लघु चलचित्र ‘अलिखित’ बारे अमित थेवेले समीक्षा गरे । बैठकले अन्य समसामयिक विषयहरू उपर समेत निर्णय गरेको सचिव थेवेले बताए ।

प्रतिक्रिया

सम्बन्धित सामाग्री

फेसबुक