सपना रोकासँग मगर संघ केन्टको अन्तरक्रिया

लण्डन । बीबीसीले २०२०मा सार्वजनिक गरेको सयजना प्रभावशाली महिलाको सूचीमा पर्न सफल सपना रोकामगरसित मगर संघ केन्ट शाखाले अन्तरक्रिया गरेको छ ।

शाखाका अध्यक्ष क्याप्टेन रिटायर्ड रामबहादुर पुनको अध्यक्षतामा भएको सो कार्यक्रममा सपना रोकामगरले आफूले गरिरहेको कार्यका बारेमा जानकारी दिनुभयो । उहाँले आफू भविष्यमा पनि निरन्तर सामाजिक कार्यमा लागि रहने योजना सुनाउनुभयो ।

शाखाका सचिव कमारे बुढामगरले सन्चालन गरेको कार्यक्रममा बोल्दै मगर संघ युकेका केन्द्रीय अध्यक्ष सुनिल रानाले सपना रोकालाई आफ्नो कार्यमा सफलताको शुभकामना दिँदै उहाँको उच्च शिक्षाका लागि संघले सक्दो सहयोग गर्ने बताउनुभयो ।

यस्तै केन्ट शाखाका अध्यक्ष रामबहादुर पुनले पनि सपनाको उच्च अध्ययनका लागि शाखाभित्र सल्लाह गरेर आगामी दिनमा के कस्तो सहयोग गर्न सकिन्छ भन्ने बारेमा जानकारी दिने बताउनु भयो ।

सपनासित अन्तरक्रियाका लागि नेपालमै रहेर महत्वपूर्ण सहयोग गर्नुभएका शाखाका सल्लाहकार टिकाराम रानाले पनि सो अवसरमा बोल्नुभएको थियो । उहाँले सपना रोकालाई सो अवसरमा शाखाका तर्फबाट मायाको चिनो र प्रश‌ंसा पत्र प्रदान गर्नुभएको थियो ।