कोरोना भाइरस संक्रमण रोक्न बेलायतमा थप कडाइ गरिने

लण्डन । बेलायतमा कोरोना संक्रमण तीव्र बन्दै गएपछि त्यसलाई रोक्न थप सरकारले कडा निर्णय गर्न लागेको छ ।

विगत सात दिनदेखि कोरोना संक्रमितहरुको संख्या दैनिक ५० हजार भन्दा माथि पुगेको र अस्पतालमा भर्ना हुने क्रम पनि वर्षकै उच्च भएपछि सरकार त्यस्तो कानुन ल्याउन बाध्य भएको हो ।

बेलायती प्रधान मन्त्री बोरिस जोनसनले आज रात आठ बजे जनतालाई सम्बोधन गर्दै त्यससम्बन्धी घोषणा गर्ने बताइएको छ ।

नयाँ भाइरसकै संक्रमण द्रुत गतिमा हुन थालेपनि त्यसलाई रोक्न सरकारले नयाँ कानुन ल्याउन लागेको हो  । उता स्कटल्यान्डले भने आज रातदेखि नै घरबाट बाहिर ननिस्कन नयाँ कानुन ल्याएको छ ।

सरकारले नयाँ कानुन ल्याएपछि बेलायतको संसदलाई बोलाइनेछ र सांसदहरूलाई बुधबार सरकारले ल्याएको नयाँ कानुनमा मतदान गर्ने मौका दिइनेछ ।