लण्डन । बेलायतमा हालसम्ममा पाँच लाख मानिसले कोरोना भाइरसविरुद्धको खोप पाएका छन् ।
बेलायतका प्रधानमन्त्री बोरिस जोनसनले सोमबार आयोजित पत्रकार सम्मेलनमा सो जानकारी दिएका हुन् ।
उनले खोप पाउनेहरुमा अधिकांश ८० वर्ष माथिकाहरु र स्वास्थ्यका कारण जोखिममा रहेकाहरु भएको बताए । खोपहरु केयर होमहरु र राष्ट्रिय स्वास्थ्य सेवा (एनएचएस) का कर्मचारीहरुलाई पनि दिइएको बताए ।
उनीहरुले फाइजर र बायोएनटेकको कोरोना भाइरसको पहिलो डोज पाएका हुन् ।
खोपका बारेमा विस्तृत तथ्यांक आएपछि सार्वजनिक गरिने बताउँदै उनले यस वर्षभित्र बेलायतमा कति खोप आइपुग्छ भन्ने प्रश्नको भने जवाफ दिएनन् ।
क्लिनिकबाट मान्यताप्राप्त कोरोना भाइरसविरुद्धको खोप सर्वसाधारणमा लगाउने बेलायत पहिलो मुलुक हो । भोलि मंगलबार बेलायतले खोप लगाउन शुरु गरेको दुई साता पुग्दैछ ।
